Ríflega 83% landsmanna bera mikið traust til Landhelgisgæslunnar. Þrátt fyrir að gæslan sé sú stofnun sem landsmenn treysta best þá dregur úr trausti til hennar annað árið í röð. Þeim sem bera mikið traust til hennar fækkar um þrjú prósentustig frá því í fyrra. Gallup hefur um árabil kannað traust almennings til nokkurra opinberra stofnana. Listinn er þó langt í frá tæmandi. Á eftir Landhelgisgæslunni kemur lögreglan. Rúmlega 69% bera mikið traust til hennar sem er svipað hlutfall og í síðustu mælingu. Tveir af hverjum þremur bera mikið traust til Háskóla Íslands, fjórum prósentustigum færri en í fyrra. Forseti Íslands missir líka fjögur prósentustig á milli ára. Tæplega 56% bera mikið traust til forsetaembættisins. Borgarstjórn rekur lestina Hástökkvarinn í mælingu Gallups þetta árið er þjóðkirkjan. 48% bera mikið traust til hennar, fimm prósentustigum fleiri en í fyrra. Traust til kirkjunnar hefur verið á uppleið frá því að Guðrún Karls Helgudóttir tók við embætti biskups sumarið 2024. Þetta er annað árið í röð þar sem þjóðkirkjan er sú stofnun sem bætir mest við sig. Traust til hennar hefur ekki verið meira frá því fyrir hrun. Sú stofnun sem missir mest traust er ríkissáttasemjari. Annað árið í röð fækkar í hópi þeirra sem bera mikið traust til embættisins um sex prósentustig en það gera 43% um þessar mundir. Líkt og í fyrra er það borgarstjórn Reykjavíkur sem rekur lestina. Rétt rúm 13% bera mikið traust til hennar. Það eru þó fjórum prósentustigum fleiri en á sama tíma í fyrra. Könnun Gallups var gerð dagana 12. til 25. febrúar. 1.980 einstaklingar í úratki voru valdir að handahófi úr viðhorfahópi fyrirtækisins. Þátttökuhlutfall var 39,9%.