181 er á lista borgaraþjónustu utanríkisráðuneytisins yfir þá sem látið hafa vita af sér í Mið-Austurlöndum. Þar af 68 fjölskyldur. 35 úr þeim hópi séu þegar farnir heim, ýmist á eigin vegum eða með björgunarflugi. Þá sé einnig stór hópur sem ekki hafi í hyggju að yfirgefa Mið-Austurlönd. „Við erum að kalla eftir upplýsingum núna, við vitum að í samtölum þá er þetta ágætishluti, það eru margir í þessum hópi sem búa og starfa í þessum heimshluta, en einhverjir af þeim vilja koma svo við erum að kalla eftir rauntölum frá fólki um hverjir vilja komast í burtu,“ segir Þurý Björk Björgvinsdóttir, deildarstjóri borgaraþjónustu utanríkisráðuneytisins. „Við sendum út tölvupóst til allra núna rétt fyrir hádegi og erum bara að bíða eftir svörum. Við höfum fengið átta sem vilja ekki aðstoð og við erum búin að fá 20 sem vilja aðstoð og 35 sem eru farnir,“ segir hún, en tekur fram að tölurnar breytist á hverri mínútu. Unnið sé náið með Norðurlöndunum og Evrópuríkjum sem séu að setja björgunarflug í loftið. Borgaraþjónustan fái tilkynningar um flug líkt og það sem fór frá Riyadh í Sádí Arabíu á vegum austurrísku ríkisstjórnarinnar. Almenn farþegaflug séu þá einnig að fara frá bæði Oman og Riyadh og einhverjir hafi bókað sig í þau. „Við í borgaraþjónustunni erum alveg vakin og sofin yfir þessu máli. Við erum með sérstakt flugteymi sem er starfsfólk hjá mér og fulltrúar frá almannavörnum sem eru að vakta öll þessi flug. Það eru að koma fleiri björgunarflug Evrópusambandsríkja inn,“ segir Þurý. Aðspurð hvort til greina komi að senda vél á vegum Íslands í björgunarflug segir hún það til skoðunar. Hún segir að kostnaður við það myndi þó hlaupa á tugum milljóna og að hvorki Norðurlöndin né Bandaríkin hafi sent slíka vél af stað. „Þetta er náttúrulega flókið því að við erum með fólk dreift um mjög stórt svæði, segir Þurý. „Miðausturlöndin eru gríðarlegt landflæmi, fólk er dreift á milli ríkja. Þá er aftur, hvert ætlarðu að fara og hvert ætlar þú að sækja fólk? Okkar geta til þess að bregðast við á staðnum takmarkast eðlilega mjög mikið við það að við erum ekki með sendiráð neins staðar í þessum heimshluta.“ Margir sem eru enn úti hafa gagnrýnt að hægt gangi að fá svör frá borgaraþjónustunni og segja litla aðstoð að fá þaðan. Þurý segir að borgarþjónustan reyni að senda leiðbeiningar til fólks til dæmis um vegabréfsáritanir, opin landamæri og ástand á vegum. „Ég veit að fólk er kannski hrætt og óöruggt og vill kannski fá önnur svör en þetta er það sem við getum gert miðað við aðstæður,“ segir Þurý.