Formaður félags íslenskra heimilislækna ber vonir til þess að allir landsmenn verði komnir með sinn heimilislækni á næstu tíu árum. Yfir hundrað sérnámslæknar í heimilislækningum stunda nú nám hér á landi. Skrif vottorða vegna skammtímaveikinda ekki góð nýting á tíma læknis Yfirfull bráðamóttaka, skortur á hjúkrunarrýmum og skortur á heilbrigðisstarfsfólki hefur meðal annars orðið til þess að mikið álag hefur verið á heilbrigðiskerfinu undanfarin misseri. Auk þess fer of mikill tími lækna í að skrifa vottorð vegna skammtímaveikinda sem Sigríður Dóra Magnúsdóttir, forstjóri Heilsugæslu höfuðborgarsvæðisins, segir að sé sóun á tíma heilbrigðisstarfsfólks. Um fimmtíu þúsund vottorð voru gefin út í fyrra. „Það er ekki góð nýting á tíma læknis að hitta einhvern ungan, hraustan aðila með kvefpest en þarf bara að fá pappír fyrir vinnuveitanda. Það er ekki góð nýting á þeirri auðlind sem tími hjá lækni er þessa dagana,“ segir Gunnar Þór Geirsson, formaður Félags íslenskra heimilislækna. Fólk af erlendum uppruna í láglaunastörfum í meirihluta Gunnar Þór segir það tilfinningu hans og fleiri lækna að ákveðnir hópar innan samfélagsins sæki í slík vottorð í meira mæli en aðrir. „Þá virðist þetta vera eins og stórt hlutfall þeirra sem eru að óska eftir vottorði sé til dæmis fólk af erlendum uppruna sem er að vinna láglaunastörf og það virðist eins og þau séu að fá þessi skammtímaveikindi vottuð.“ Um hundrað sérnámslæknar í heimilislækningum við nám á Íslandi Gunnar Þór segir að hægt sé að draga úr álagi innan heilbrigðiskerfisins með öflugum heimilislækningum og heilsugæslu. Hann segir framtíðina bjarta í þeim efnum — um hundrað sérnámslæknar í heimilislækningum séu við nám hér á landi. „Ég myndi segja að við séum í raun og veru í dauðafæri að ná því að allir landsmenn geti verið með sinn heimilislækni á næstu tíu árum, það er að segja ef vel er haldið á spöðunum.“