Á næsta fiskveiðiári verða grásleppuveiðar aftur byggðar á sóknardögum en ekki kvóta eins og næstu tvö fiskveiðiár á undan. Hart hefur verið deilt um breytingarnar á Alþingi en reglur um grásleppu virðast umdeildar á hvorn veginn sem er. Svona var andrúmsloftið á Alþingi skömmu áður en umdeilt frumvarp um afnám kvótasetningar á grásleppu var samþykkt. Skoðanir sjómanna eru skiptar en þeir virðast þó margir rólegri yfir breytingunum en þingmenn stjórnarandstöðunnar. Í mjög einfölduðu máli snúast lögin um þetta: Fyrir yfirstandandi fiskveiðiár og það síðasta, var ákveðið að takmarka hve mikið hver sjómaður má veiða af grásleppu. Það var gefinn út kvóti . Árin á undan var veiðunum stýrt með sóknardagakerfi , hver sjómaður mátti veiða eins og mikið og hann gat, en aðeins í takmarkaðan fjölda daga á ári. Á sínum tíma mótmæltu margir kvótanum, til dæmis því að hann yrði reiknaður út frá veiðireynslu á tilteknum tíma. Þeir sem af ólíkum ástæðum komu illa út úr þeim útreikningi fengu sumir lítinn eða engan kvóta . Öðrum þótti erfiðara fyrir nýliða að komast inn í greinina með kvótanum, óttuðust framsal á kvóta og skildu ekki tilgang þess að kvótasetja fisk sem ekki er ofveiddur, að mati Hafrannsóknarstofnunar. Þessi hópur fagnar því þá líklega að farið verði aftur í dagakerfið. Víðir Örn Jónsson, sem við hittum við löndun í Dalvíkurhöfn. Hann segir það koma betur út fyrir sinn rekstur að hafa kvótann. „Já, ég bara eins og að ráða menn, vita hvað þeir eru að fara í“, segir Víðir „Nú vitum við bara nákvæmlega hvað má veiða. Fyrir mig er þetta betra.“ Af hverju eru þingmenn að tengja grásleppuna við ESB? En hvers vegna tala þingmenn um dómstóla og ESB í umræðu um hvernig eigi að stýra veiðum á fiski sem í raun hefur frekar lítil áhrif á þjóðarbúið miðað við aðrar tegundir? Minnihlutinn hefur fundið málinu margt til foráttu. Til dæmis að það stangist á við stjórnarskrá að taka af fólki verðmætan framseljanlegan kvóta - og einhverjir hafa talað um að leita réttar síns fyrir dómstólum. Öðrum þykir málið illa undirbúið og að atkvæðagreiðslunni hafi verið komið á í flýti án samráðs við þingflokksformenn. Frumvarpið er komið frá Lilju Rafneyju Magnúsdóttur sem er formaður atvinnuveganefndar Alþingis og þingmaður Flokks fólksins. Og þaðan kemur ESB-vísunin, því kenning minnihlutans hefur verið að Flokkur fólksins hafi fengið í gegn breytingar á grásleppu- og strandveiðum gegn því að fylgja Viðreisn og Samfylkingunni inn í viðræður um aðild að Evrópusambandinu. Veiðistjórnun á grásleppu kyndir undir þingmönnum, sama hvort til stendur að setja fiskinn í kvóta eða ekki.