پاکستانی معیشت اس وقت جس دباؤ سے گزر رہی ہے اس میں ہر حکومتی فیصلہ براہ راست عوام کی زندگیوں پر اثر انداز ہوتا ہے، مگر گذشتہ رات پیٹرول کی قیمت میں یک دم فی لیٹر 55 روپے کے اضافے نے پہلے سے پریشان عوام پر مہنگائی کا ایک اور پہاڑ گرا دیا۔ یہ محض قیمت میں اضافہ نہیں بلکہ معیشت کے ہر پہیے کو مہنگا کرنے کا اعلان ہے۔ ایک ایسے ملک میں جہاں پہلے ہی بجلی، گیس، آٹا اور بنیادی اشیائے خوردونوش کی قیمتیں عام آدمی کی پہنچ سے باہر ہوتی جا رہی ہوں، وہاں پیٹرول کی قیمت میں اتنا بڑا اضافہ دراصل مہنگائی کے ایک ایسے سلسلے کو جنم دیتا ہے، جو ٹرانسپورٹ سے لے کر خوراک، صنعت، زراعت اور روزمرہ زندگی کے ہر شعبے تک پھیل جاتا ہے۔ پاکستان میں پیٹرول صرف گاڑیوں کے لیے استعمال ہونے والا ایندھن نہیں بلکہ پورے معاشی ڈھانچے کی بنیاد ہے۔ جب پیٹرول مہنگا ہوتا ہے تو سب سے پہلے ٹرانسپورٹ مہنگی ہوتی ہے، اس کے بعد اشیائے خورونوش کی قیمتیں بڑھتی ہیں، کسان کے لیے کھاد اور فصل کی ترسیل مہنگی ہو جاتی ہے، مزدور کے سفر کے اخراجات بڑھ جاتے ہیں اور صنعت کار اپنی پیداواری لاگت میں اضافہ عوام پر منتقل کر دیتا ہے۔ اس طرح ایک پیٹرول بم پورے معاشرے میں مہنگائی کی لہر پیدا کر دیتا ہے، جس کی قیمت سب سے زیادہ غریب اور متوسط طبقہ ادا کرتا ہے۔ مزید پڑھ اس سیکشن میں متعلقہ حوالہ پوائنٹس شامل ہیں (Related Nodes field) اصل سوال یہ ہے کہ کیا حکومت کے پاس اس کے علاوہ کوئی اور راستہ نہیں تھا؟ حقیقت یہ ہے کہ اگر سنجیدہ اور عوام دوست پالیسی سازی کی جاتی تو کئی ایسے متبادل راستے موجود تھے، جنہیں اختیار کر کے عوام کو ریلیف دیا جا سکتا تھا۔ سب سے پہلے تو حکمران طبقے اور بیوروکریسی کو ملنے والی شاہانہ مراعات کا خاتمہ کیا جا سکتا تھا۔ پاکستان میں ہزاروں سرکاری افسران اور حکومتی عہدے داروں کو مفت پیٹرول، سرکاری گاڑیاں اور بے شمار سہولیات فراہم کی جاتی ہیں۔ یہ مراعات قومی خزانے پر اربوں روپے کا بوجھ ڈالتی ہیں۔ اگر حکومت واقعی معاشی بحران کا مقابلہ کرنا چاہتی تو سب سے پہلے ان مراعات کو ختم کرتی۔ ایک ایسے ملک میں جہاں عام شہری کو پیٹرول خریدنے کے لیے اپنی آمدنی کا بڑا حصہ خرچ کرنا پڑتا ہو، وہاں سرکاری عہدے داروں کو مفت پیٹرول فراہم کرنا معاشی انصاف کے اصولوں کے خلاف ہے۔ حکومت کے پاس ایک اور مؤثر راستہ جدید ٹیکنالوجی کو استعمال کرتے ہوئے اخراجات کم کرنے کا بھی تھا۔ دنیا کے کئی ممالک میں اب سرکاری اداروں اور نجی کمپنیوں میں ورک فرام ہوم کا نظام رائج ہو چکا ہے۔ اگر پاکستان میں بھی سرکاری دفاتر کے کچھ حصوں میں ہفتے کے چند دن گھر سے کام کرنے کی پالیسی اپنائی جائے تو روزانہ لاکھوں گاڑیوں کے سفر میں کمی آ سکتی ہے۔ اس سے نہ صرف پیٹرول کی کھپت کم ہوگی بلکہ ٹریفک کے مسائل اور فضائی آلودگی میں بھی کمی آئے گی۔ اسی طرح اگر سرکاری اجلاسوں اور انتظامی امور کو زیادہ سے زیادہ آن لائن منتقل کیا جائے تو سرکاری گاڑیوں کے بے تحاشا استعمال کو کم کیا جا سکتا ہے۔ تعلیم کے شعبے میں بھی جدید طریقوں کو اپنانا وقت کی اہم ضرورت ہے۔ پاکستان میں لاکھوں طلبہ روزانہ سکولوں، کالجوں اور یونیورسٹیوں تک پہنچنے کے لیے طویل سفر کرتے ہیں، جس کے لیے بڑی مقدار میں پیٹرول استعمال ہوتا ہے۔ اگر تعلیمی اداروں میں ہائبرڈ یا آن لائن تعلیم کا جزوی نظام متعارف کروایا جائے تو اس سے ٹرانسپورٹ کے اخراجات اور ایندھن کے استعمال میں نمایاں کمی آ سکتی ہے۔ دنیا کی بڑی جامعات پہلے ہی اس ماڈل کو اپنا چکی ہیں جہاں کچھ لیکچر آن لائن اور کچھ کلاس روم میں ہوتے ہیں۔ اس طریقے سے نہ صرف اخراجات کم ہوتے ہیں بلکہ طلبہ کو جدید تعلیمی سہولیات بھی میسر آتی ہیں۔ اسی طرح حکومت کے پاس ایک بڑا راستہ ٹیکس نظام میں اصلاحات کا بھی تھا۔ پاکستان میں ٹیکس کا زیادہ بوجھ ہمیشہ عام شہری پر ڈالا جاتا ہے جبکہ بڑے جاگیردار، ریئل سٹیٹ کے بڑے کھلاڑی اور طاقت ور کاروباری گروہ اکثر ٹیکس نیٹ سے باہر رہتے ہیں۔ اگر حکومت سنجیدگی سے ان طبقات کو ٹیکس کے دائرے میں لاتی تو قومی خزانے کو اربوں روپے کا اضافی ریونیو حاصل ہو سکتا تھا، مگر بدقسمتی سے طاقت ور طبقات کو چیلنج کرنے کی بجائے ہمیشہ وہ راستہ اختیار کیا جاتا ہے جس کا بوجھ براہ راست عوام پر پڑتا ہے۔ سرکاری اداروں کی بدانتظامی بھی ایک بڑا مسئلہ ہے۔ پاکستان کے کئی سرکاری ادارے ہر سال سینکڑوں ارب روپے کا خسارہ دیتے ہیں۔ ان اداروں میں سیاسی مداخلت، بدعنوانی اور غیر ضروری اخراجات عام ہیں۔ اگر حکومت ان اداروں میں شفافیت لانے اور میرٹ پر انتظامیہ مقرر کرنے کے لیے سنجیدہ اصلاحات کرتی تو قومی خزانے پر پڑنے والا بھاری بوجھ کم ہو سکتا تھا، مگر اصلاحات کے اس مشکل مگر ضروری راستے کی بجائے عوام پر پیٹرول مہنگا کرنے کا آسان مگر غیر مقبول فیصلہ مسلط کر دیا گیا۔ View this post on Instagram A post shared by Independent Urdu (@indyurdu) توانائی کے متبادل ذرائع کی طرف سنجیدہ توجہ دینا بھی وقت کی ضرورت ہے۔ دنیا تیزی سے شمسی اور ہوا سے پیدا ہونے والی توانائی کی طرف بڑھ رہی ہے۔ اگر پاکستان گذشتہ برسوں میں قابل تجدید توانائی کے منصوبوں پر مستقل مزاجی سے کام کرتا تو آج درآمدی ایندھن پر انحصار اتنا زیادہ نہ ہوتا۔ مگر یہاں توانائی کی پالیسیوں میں تسلسل کا فقدان رہا جس کا نتیجہ آج عوام مہنگائی کی صورت میں بھگت رہے ہیں۔ پیٹرول کی قیمت میں اتنا بڑا اضافہ دراصل ریاست اور عوام کے درمیان اعتماد کے رشتے کو بھی متاثر کرتا ہے۔ جب عوام کو یہ محسوس ہونے لگے کہ معاشی بحران کا بوجھ صرف ان کے کندھوں پر ڈالا جا رہا ہے جبکہ حکمران طبقہ اپنی مراعات برقرار رکھے ہوئے ہے تو معاشرے میں بے چینی اور مایوسی بڑھتی ہے۔ یہی وجہ ہے کہ آج پاکستان میں مہنگائی صرف ایک معاشی مسئلہ نہیں بلکہ ایک بڑا سماجی اور سیاسی چیلنج بن چکی ہے۔ حکومت کو سمجھنا ہو گا کہ معاشی استحکام صرف قیمتیں بڑھانے سے حاصل نہیں ہوتا بلکہ اس کے لیے انصاف پر مبنی پالیسیوں اور جرات مندانہ اصلاحات کی ضرورت ہوتی ہے۔ اگر حکمران واقعی عوام کو ریلیف دینا چاہتے ہیں تو سب سے پہلے اپنی مراعات کم کرنا ہوں گی، مفت پیٹرول اور شاہانہ سہولیات کو ختم کرنا ہوگا، جدید ٹیکنالوجی کے ذریعے ورک فرام ہوم اور آن لائن نظام کو فروغ دینا ہوگا، طاقت ور طبقات کو ٹیکس نیٹ میں لانا ہوگا اور سرکاری اداروں کی اصلاح کرنی ہوگی۔ بصورت دیگر پیٹرول کی قیمتوں میں ہر نیا اضافہ مہنگائی کے ایک نئے طوفان کو جنم دیتا رہے گا اور اس طوفان میں سب سے زیادہ متاثر وہی عام پاکستانی ہوں گے، جو پہلے ہی معاشی مشکلات کے بوجھ تلے دبے ہوئے ہیں۔ نوٹ: یہ تحریر بلاگر کی ذاتی آرا پر مبنی ہے، انڈپینڈنٹ اردو کا اس سے متفق ہونا ضروری نہیں۔ پیٹرول پاکستانی معیشت مہنگائی حکومت کو سمجھنا ہو گا کہ معاشی استحکام صرف قیمتیں بڑھانے سے حاصل نہیں ہوتا بلکہ اس کے لیے انصاف پر مبنی پالیسیوں اور جرات مندانہ اصلاحات کی ضرورت ہوتی ہے۔ عروج رضا صیامی اتوار, مارچ 8, 2026 - 09:30 Main image:

سات مارچ، 2026 کو کراچی میں پیٹرول کی بڑھتی ہوئی قیمتوں کے موقعے پر ایک پیٹرول پمپ پر رش لگا ہوا ہے (اے ایف پی)

معیشت type: news related nodes: پیٹرول اور ڈیزل کی قیمتوں میں 55 روپے کا اضافہ ’پاکستان کے پاس پیٹرول کا 28 روزہ ذخیرہ‘، وزارت پیٹرولیم کو ترسیل کی سعودی یقین دہانی رمضان، مہنگائی اور بے بسی: کیا ہر سال یہی کہانی دہرائی جائے گی؟ ہمیں سفر مہنگا کیوں پڑتا ہے؟ SEO Title: پیٹرول کا بم عوام پر، حکومتی عیاشیاں برقرار copyright: show related homepage: Hide from Homepage