Merktum lunda sem hefur verpt í Vestmannaeyjum skolaði dauðum á land í Portúgal fyrir skemmstu. Hann er einn þúsunda sem hefur skolað á land í Evrópu undanfarnar vikur. Tugþúsundum fuglshræja hefur síðan í janúar skolað á land í Portúgal, Frakklandi, á Spáni og Bretlandi, meirihluti fuglanna eru lundar. Um þetta hefur BBC meðal annarra fjallað. „Þetta er ekkert þannig lagað óalgengt, þetta gerist alltaf af og til. En það sem menn hafa áhyggjur af í rauninni er að tíðni storma, og sérstaklega hversu lengi þeir vara, er að aukast í kjölfar hlýnunar,“ segir Erpur Snær Hansen, líffræðingur sem hefur rannsakað lunda í áratugi. Fuglarnir drepast í langvinnum stormum á hafi úti. „Það sem menn halda að gerist er að í öldurótinu sem verður í þessum stormum þá lækki fæðan sig frá yfirborðinu og þá sé erfiðara fyrir þessa kafara að ná niður í fæðuna. Þeir þurfa að hafa meira fyrir því að ná í fæðuna og enda með því að fá ekki nóg til að halda sér á lífi, greyin,“ segir Erpur Snær. Þeir merktu fuglar sem hafa fundist verpa flestir í Skotlandi en Erpur segist hafa fengið tilkynningu um einn fugl úr íslenska varpstofninum. „Það vildi þannig til að ég var að fá endurheimtutilkynningu um að einum fugli sem var merktur hérna í Stórhöfða í Vestmannaeyjum og rak þarna að landi í Portúgal. Þannig að einhver jaðarprósenta af okkar fuglum er þarna á þessu svæði.“ Erpur segir íslenska varpstofninn, sem sé stærri en sá skoski, þó halda sig vestar og á stærra hafsvæði en þeir fuglar sem hafi verið að skola á land í Evrópu. „Meginþunginn í útbreiðslunni á okkar fuglum er á mun stærra svæði og hafrænna vestur af Evrópu. Á móti kemur að við vitum ekki um stærð þessara affalla vegna þess að þeir eru svo langt út á sjó að þessi hræ berast aldrei að landi eins og er að gerast núna í Evrópu.“ Hefur þú áhyggjur af því að þetta gæti verið högg fyrir íslenska stofninn? „Já, þetta getur alveg verið það. Sérstaklega óttast maður nú frekar að þessi tíðni storma er auðsjáanlega að aukast.“