Bandaríski herinn gerði miklar árásir á Kharg-eyju norðarlega í Persaflóa í gær. Nær allur flutningur á hráolíu fer um eyjuna. Donald Trump Bandaríkjaforseti greindi frá árásunum í færslu á samfélagsmiðlinum Truth Social, og sagði árásirnar vera einar mestu árásir sögunnar í Mið-Austurlöndum og að hernaðarleg skotmörk hefðu verið þurrkuð út í krúnudjásni Írans, á Kharg-eyju. Trump sagði að olíuinnviðum hefði verið hlíft í árásinni en ef olíuflutningaskip fái ekki að sigla frjáls og örugg um Hormússund muni hann endurskoða ákvörðun sína um að hlífa olíuinnviðum. Trump sagði að bandaríski sjóherinn myndi brátt fylgja skipum í gegnum Hormússund svo olíuflutningar um sundið geti haldið áfram. Kharg-eyja er um þrjátíu kílómetra frá meginlandi Íran, norðarlega í Persaflóa og um 22 ferkílómetrar að stærð. Eyjan er kölluð Bannaða eyjan meðal Írana, samkvæmt umfjöllun fréttamiðilsins Al Jazzera um eyjuna. Gríðarlegt eftirlit og strangt öryggi er á eyjunni sem er vöktuð af hermönnum Íranska byltingarvarðarins. Þangað fer enginn án öryggisvottunar. Eyjan var byggð upp að miklu leyti á 7. og 8. áratug síðustu aldar, þegar olíuvinnsla og útflutningur Íran var í miklum vexti. Meirihluti strandlengju Írans var of grunnur fyrir stór olíuflutningaskip og því var eyjan byggð upp til að þjónusta stór olíuflutningaskip. Um 90% af hráolíuútflutningi Írans fer um eyjuna eða um 950 milljónir olíutunna á hverju ári. Hún er því gríðarlega mikilvæg fyrir olíuútflutning Írana.