Израел го разгледува францускиот предлог според кој Либан формално би ја признал израелската држава во замена за гаранции за прекин на воздушните напади и повлекување на израелските трупи од пет стратешки локации на југот на земјата. Станува збор за области што се наоѓаат спроти населбите на северот на Израел и каде што израелската армија ги задржала позициите кршејќи го договорот за прекин на огнот од ноември 2024 година, пишуваат израелскиот „Хаарец“ и американскиот „Аксиос“. Според извор цитиран од „Хаарец“, израелскиот премиер Бенјамин Нетанјаху сè уште не е одлучен дали да го прифати францускиот план. Весникот додава дека официјални лица во Вашингтон проценуваат дека американското „трпение“ за војната во Либан ќе истече штом заврши „главната“ војна против Иран. Тоа создава краток временски период за преговори со Либан, чија влада, според „Хаарец“, веројатно би платила висока дипломатска цена за невиден потег како што е официјално признавање на Израел. „Аксиос“ објави дека францускиот предлог предвидува Израел и Либан, со посредство на САД и Франција, да започнат преговори за „политичка декларација“. Целта би била да се постигне договор за таа декларација во рок од еден месец. Актуелната војна меѓу Израел и Либан започна на 2 март, откако Хезболах испука ракети во северен Израел. Нападот дојде како одговор на израелските напади врз Иран, во кои беше убиен врховниот лидер на Иран.