Áfram var tekist á um væntanlega þjóðaratkvæðagreiðslu um aðildarviðræður við ESB á Alþingi í dag. Þingfundur hófst klukkan þrjú á óundirbúnum fyrirspurnatíma til ráðherra og sneri meirihluti fyrirspurna að fyrirhugaðri þjóðaratkvæðagreiðslu. Kristrún Frostadóttir forsætisráðherra gagnrýndi málflutning stjórnarandstöðunnar eftir spurningar Guðrúnar Hafsteinsdóttur, formanns Sjálfstæðisflokksins, og Sigmundar Davíðs Gunnlaugssonar, formanns Miðflokksins. Guðrún Hafsteinsdóttir, formaður Sjálfstæðisflokksins, var fyrst og kallaði eftir útskýringum á hvaða forsendum ríkisstjórnin ætlaði í aðildarviðræður. Hún taldi nauðsynlegt að þjóðin fengi að vita á hvaða forsendum aðildarviðræður við ESB hæfust. Hún leit aftur til umræðna um ESB árið 2009 og sagði að forsendur hefðu þá legið skýrar fyrir. „Þá var farið ítarlega yfir samningsmarkmið, fyrirvara, skipulag viðræðna og samráð við hagsmunaaðila. Þá var ekki beðið um blint traust á ríkisstjórninni annað en gert er núna þar sem ekki er einu sinni hægt að segja okkur hér á Alþingi né þjóðinni hver skilyrðin eigi að vera,“ sagði Guðrún. Til stendur að fyrri umræða um þjóðaratkvæðagreiðslu Íslands um aðildarviðræður við ESB haldi áfram síðar í dag. Aðlögun hefjist á sama tíma og aðildarviðræður Sigmundur tók undir orð Guðrúnar og sagði ríkisstjórnina meira fyrir umbúðir en innihald og sakaði hana og ríkisstjórnina um að fela það fyrir þjóðinni að með því að hefja aðildarviðræður að nýju þyrfti Ísland að hefja aðlögunarferli með tilheyrandi lagabreytingum. „Hæstvirtur forsætisráðherra neitar að svara því hvort aðlögun að Evrópusambandinu hefjist strax með aðildarviðræðunum,“ sagði hann. „Er hæstv. forsætisráðherra búinn að átta sig á því núna að þegar ríki sækir um aðild að Evrópusambandinu og gengur til viðræðna þá ber því strax að byrja að laga sig að sambandinu með ýmsum leiðum, með lagabreytingu með nýjum stofnunum, fjölgun embættismanna, stækkun báknsins með þeim aðferðum sem Evrópusambandið krefst af umsóknarríkjum,“ sagði Sigmundur. Kristrún svaraði þessu með því að spyrja Sigmund hvort Miðflokkurinn hefði eitthvað að fela í umræðunum um ESB. „Hvað hefur Miðflokkurinn að fela í þessu máli? Hvað hefur Miðflokkurinn að fela fyrir þjóðinni í umræðu um kosti um Evrópusambandið? Af hverju má ekki tala um samkeppnismál?“ spurði Kristrún. „Af hverju má ekki tala um tollamál? Af hverju má ekki tala um myntbandalag? Er þetta kannski eitthvað sem Miðflokkurinn vill ekki að þjóðin fái að taka þátt í umræðu um?“ Þá sagði hún að ekki væri skylda til þess að gera annað en það sem Alþingi samþykkti eða það sem samþykkt væri í þjóðaratkvæðagreiðslu. „Við erum með stjórnarskrá í þessu landi. Við erum með þingræði í þessu landi. Það liggur alveg fyrir. Það er verið að reyna að þvæla þessu máli í umræðu um eitthvað annað en það að taka málefnalega umræðu um hvað þessi þjóðaratkvæðagreiðsla snýst um,“ sagði hún. „Hér er stöðugt, talandi um blekkingar, verið að halda því fram að við séum að bakka með Ísland inn í Evrópusambandið án þess að þjóðin viti af því. Það er rangt. Það er kolrangt, frú forseti, og það skiptir máli að slíkur málflutningur fái ekki að lifa. Það er þjóðin sem fær fyrsta orðið og hún fær líka lokaorðið í þessu máli,“ sagði Kristrún.