Frumvarp Hönnu Katrínar Friðriksson, innviðaráðherra um lagareldi var lagt fram á Alþingi í dag. Talsverðar breytingar voru gerðar á frumvarpinu síðan það var birt í samráðsgátt til að bregðast við þeim athugasemdum sem sendar voru inn. Megnið af athugasemdunum sem bárust voru frá einstaklingum sem gagnrýndu fiskeldi í opnum sjókvíum út frá náttúruvernd. Þó voru einhverjar sem fögnuðu fyrirhugaðri lagasetningu. Alls bárust 923 umsagnir frá einstaklingum, fyrirtækjum, hagsmunaaðilum, stjórnvöldum, sveitarfélögum og samtökum þeirra. Tekið er fram í greinargerð frumvarpsins að ef horft er til þess að hver umsögn frá hverjum aðila telji aðeins einu sinni lækkar talan um 100. Utan samráðsgáttar bárust þó fleiri umsagnir eða alls 1635. Þær voru frá þeim sem ekki gátu auðkennt sig með rafrænum skilríkjum og voru að mestu umsagnir frá erlendum aðilum. Hlutverk Umhverfis- og orkustofnunar aukið Meðal breytinga sem gerðar voru á frumvarpinu eru að takmörkun á heimild Matvælastofnunar til útgáfu á rekstrarleyfum til erlendra aðila einskorðast núna við sjókvíaeldi og hafeldi. Því gilda þær takmarkanir ekki um útgáfu Matvælastofnunar á leyfum til erlendra aðila sem stunda landeldi. Þá fær Umhverfis- og orkustofnun stærra hlutverk þar sem Matvælastofnun þarf samkvæmt nýjustu útgáfu frumvarpsins að hafa samráð við stofnunina við vinnslu umsókna um rekstrarleyfi. Þá þurfi einnig að hafa samráð við hana ef gera á breytingar á rekstrarleyfum og getur Umhverfis- og orkustofnun einnig haft frumkvæði að því. Við endurnýjun rekstrarleyfis þarf Matvælastofnun einnig að afla bindandi umsagnar frá Umhverfis- og orkustofnun. Aðrar breytingar fela í sér að Hafrannsóknastofnun verður gert kleift að fela einkaaðilum vöktun í ám landsins þar sem fylgst er með hvort eldislaxar séu þar í auknum mæli. Þá verður Tilraunastöð Háskóla Íslands í meinafræði að Keldum leyft að stunda rannsóknir á eldi fiska ásamt Hafrannsóknarstofnun.