Oddvitar Samfylkingarinnar, Sjálfstæðisflokksins og Viðreisnar í Reykjavík mættust í Silfrinu í kvöld. Oddvitarnir fóru um víðan völl og ræddu sýn sína á rekstur borgarinnar og helstu álitamálin í aðdraganda sveitarstjórnarkosninga eftir tvo mánuði, eða 16. maí. Hildur Björnsdóttir, oddviti Sjálfstæðisflokksins í Reykjavík, og Björg Magnúsdóttir, oddviti Viðreisnar í Reykjavík, segja mikilvægt að hagrætt verði í rekstri borgarinnar og áhersla einkum lögð á að þjónusta borgarbúa. Höfuðborgin sinni ýmsum verkefnum sem önnur sveitarfélög geri ekki. Pétur Marteinsson, oddviti Samfylkingarinnar í Reykjavík, segist ekki boða hagræðingu en að fyrir allan rekstur, hvort sem um opinberan ræðir eða ekki, sé mikilvægt að huga stanslaust að útgjöldum. Það sé hins vegar einnig verkefni borgarfulltrúa að hafa borgina sem skemmtilegasta. Björg Magnúsdóttir, Hildur Björnsdóttir og Pétur Marteinsson ræddu sýn sína á rekstur Reykjavíkurborgar og hvort þörf sé á hagræðingu í Silfrinu í kvöld. Íbúar Reykjavíkur njóta ekki stærðarhagkvæmni Hildur Björnsdóttir, oddviti Sjálfstæðisflokksins í Reykjavík, segir yfirbyggingu borgarinnar hafa stækkað mjög mikið á um 20 ára tímabili. „Snemma á þessu kjörtímabili birtist með fjárhagsáætlun borgarinnar viðvörun frá fjármála- og áhættustýringarsviði borgarinnar þar sem segir að á fimm ára tímabili hafi íbúum borgarinnar fjölgað um 10% en starfsmönnum um 25%. Þannig að starfsmönnum borgarinnar hafði fjölgað langt umfram þessa lýðfræðilegu þróun og þarna var verið að benda á að þessi þróun er auðvitað ekki sjálfbær,“ segir Hildur. Þá njóti íbúar Reykjavíkur ekki stærðarhagkvæmni í rekstri. „Íbúar í Reykjavík eru að borga meira í laun og launatengd gjöld með starfsmönnum borgarinnar heldur en íbúar nágrannasveitarfélaga. Hér starfa fleiri per íbúa heldur en í nágrannasveitarfélögum þannig að það eru alls konar merki sem við erum með í rekstrinum um að hér starfi of mikið fólk.“ Hildur hefur ítrekað lagt til að Mannréttindaskrifstofa Reykjavíkurborgar verði lögð niður. „Þangað fara nokkur hundruð milljónir á ári hverju og við erum eina sveitarfélagið sem rekur mannréttindaskrifstofu. Ég veit ekki til þess að mannréttindi séu fótum troðin í Garðabæ eða Hafnarfirði eða Mosfellsbæ þótt þar sé ekki starfrækt slík skrifstofa,“ segir Hildur. Þá vísar Hildur til Friðriks Sophussonar sem skrifaði að hið opinbera ætti að gera sem fæst en sem best. „Það er svolítið það sem við þurfum að gera. Við þurfum að kjarna okkur í því að sinna þessari lögbundnu þjónustu við borgarana og hætta í öllum þessum aukaatriðum sem við erum að sinna.“ „Við erum að rækta samfélag“ Pétur Marteinsson er nýr oddviti Samfylkingarinnar í Reykjavík en hann státaði sitjandi oddvita og borgarstjóra, Heiðu Björgu Hilmisdóttur, í prófkjöri flokksins í janúar. Margir hafa gagnrýnt Samfylkinguna fyrir að útgjöld borgarinnar hafi stóraukist á síðustu árum en flokkurinn hefur lengi verið í borgarstjórn. Pétur bendir á að borgin hafi verið í gríðarlegum vexti síðasta áratug. Fólki hafi fjölgað og mikið verið byggt. „Í þannig stöðu, hvort sem þú ert að reka fyrirtæki eða að reka hið opinbera, þegar það er vöxtur þá verður oft eitthvað fitulag sem þarf að skoða – bara í öllum rekstri og á heimilum líka. Það þarf að skoða og rýna reksturinn á hverjum einasta degi og gjöld sérstaklega,“ segir Pétur. Borgin sé þannig að tekjur séu stöðugar á meðan gjöldin séu tiltölulega breytileg. „Þetta er eitthvað sem er bara stöðugt verkefni. Það er hins vegar munur á að reka Reykjavíkurborg, eða sveitarfélag, eða fyrirtæki. Fyrirtæki eru náttúrulega að reyna að ávaxta pundi fyrir sína hluthafa meðan við erum að rækta samfélag.“ Pétur segist sammála því að borgin verði að sinna sínum grunnskyldum og þjónustu við íbúa. „Það er hins vegar verkefni okkar að hafa borgina sem allra skemmtilegasta og besta. Það mun ekki stranda á mér. Ég mun ekki standa í vegi fyrir því ef það er augljóst að það þurfi að skera niður einhvers staðar,“ segir Pétur. Telur þú þig geta skorið niður eða hagrætt mikið í rekstri borgarinnar? „Það er alltaf hægt að hagræða. Það er hins vegar ekki það sem ég kem með að borðinu, að það þurfi að hagræða, ég á eftir að skoða það betur,“ segir Pétur. „Svona back to basics -kosningar“ Björg Magnúsdóttir var kjörin oddviti Viðreisnar í leiðtogaprófkjöri í janúar. Flokkurinn hefur talað fyrir því að „afrugla verði Reykjavík“. „Ef maður horfir á stóra samhengi hlutanna þá hefur verið sami meirihluti, eða svipaður meirihluti með svipað prógramm, núna í 12 ár. Við vitum það bara öll að með hverju ári þá safnast smá fita, verður meiri værukærð, fólk fer aðeins dýpra ofan í stólana sína og þú veist – völd spilla að einhverju leyti líka,“ segir Björg. Hún heyrir það í samræðum við Reykvíkinga að ákall sé eftir því að borgaryfirvöld breyti um hugsun. „Breytum um takt og fáum ferska sýn á verkefnin. Mér finnst þetta vera svona verkefni, og ég tek undir með félögum mínum hér, að það er ágætt að gera þetta með reglulegum hætti. Er þetta debit og kredit að meika sens eða þurfum við að skera út verkefni?“ Sífellt sé verið að hrinda af stað verkefnum sem hafi verið frábær á sínum tíma. Síðan líði árin, starfsfólk sinni þeim áfram en verkefni þjóni ekki endilega lengur sínum tilgangi. „Við orðum þetta þannig, við í Viðreisn, að fólkið sem er ekki í þessari beinu þjónustu við Reykvíkinga, og þá erum við auðvitað að tala um þessa grunnþjónustu sem við komum ágætlega inn á hér áðan. Það eru leikskólastarfsmennirnir, það eru kennararnir, þau sem eru að taka ruslið okkar, sópa götur, gera fínt og allt þetta,“ segir Hildur. „Það eru þessi basic verkefni. Mér finnst þetta vera pínu svona back to basics- kosningar – að við förum bara að sinna þessum basic verkefnum vel. Þetta eru ekki alltaf skemmtilegustu eða mest sexí verkefnin en það er ekki heldur hlutverk borgarfulltrúa að finna upp einhver svaka sexí verkefni til að sinna. Við eigum bara að sinna þessum grunni mjög vel.