Erfitt er að segja til um hvenær stríðinu í Mið-Austurlöndum lýkur þar sem markmið þess eru óljós og tímalínan sömuleiðis. Þetta segir Magnús Þorkell Bernharðsson, prófessor í nútímasögu Mið-Austurlanda, í samtali við Morgunútvarpið á Rás tvö. „Það virðast ekki vera nein augljós endalok á þessu stríði og vandinn við það er kannski að markmið stríðsins eru svo óljós. Við vitum ekki í raun og veru hver tilgangur þess er, bæði frá bæjardyrum Bandaríkjanna og bæjardyrum Ísraela. Frá bæjardyrum Írana er tilgangur stríðsins mjög augljós og það er að verja sig og koma í veg fyrir stjórnarskipti í landinu. En við vitum ekki hvað telst sigur þannig að við vitum í rauninni ekki hver tímalínan er og þar af leiðandi er ekki hægt að vega og meta hvort við séum að stefna í átt að því að þessu stríði sé að ljúka.“ Berjast til síðasta manns Magnús segir árásirnar í Íran hafa haft töluverða eyðileggingu í för með sér á innviðum landsins, ekki síst á hernaðarmannvirkjum þess. Íranar berjist nánast til síðasta manns og stóli á tiltölulega ódýr og auðveld vopn til þess að knýja fram markmið sín. „Þetta er ekki svona eins og á vesturvígstöðvunum þar sem það voru nokkrir herir að mætast á vígvelli. Þetta er allt öðruvísi stríð og þess vegna vitum við ekki alveg hvenær við getum sagt að þessu muni ljúka.“ „Þetta er ekki þeirra stríð“ Í Morgunútvarpinu var Magnús Þorkell einnig spurður um mikilvægi Hormússunds sem hann segir vera mjög mikilvæga æð fyrir olíu- og gasframleiðslu heimsins. Þar sigli um 10-20% af allri olíuframleiðslu heimsins. Umleitanir Donalds Trumps Bandaríkjaforseta bar einnig á góma, en hann hefur ótrekað óskað eftir því að önnur ríki sendi herskip sín í Hormússund. Magnús segir beiðni forsetans hafa komið flatt upp á flesta, enda væri mikil áhætta fólgin í slíkum aðgerðum. „Þetta er ekki þeirra stríð. Þetta stríð var ekki undirbúið nægilega vel. Það er ekki eins og það hafi farið fram meiriháttar umræða á alþjóðavettvangi, til dæmis hjá Sameinuðu þjóðunum, NATO, eða á öðrum fundum þar sem þjóðarleiðtogar hittast.“ „Síðan er það álitið sem svo að þetta stríð Bandaríkjanna og Ísraels og önnur ríki vilji gjarnan ekki taka þátt í þessu. Síðast en ekki síst hafa kannski samskipti Bandaríkjastjórnar við samstarfsaðila þeirra víða um heim ekki endilega verið alltaf á jákvæðum nótum undanfarna mánuði og þar af leiðandi treysta jafnvel traustir vinir þeirra ekki endilega stjórninni þar og vita ekki alveg hvert markmiðið er með þessu stríði.“