Donald Trump Bandaríkjaforseti hefur óskað eftir að nokkur ríki, þar á meðal Frakkland, Kína, Japan og Bretland, sendi herskip til Hormússunds til að tryggja að flutningaskip komist þar um ósködduð fyrir mögulegum árásum Írana. Fálega hefur verið tekið í þessar beiðnir. Kaja Kallas, utanríkismálastjóri Evrópusambandsins, sagði í viðtali við Reuters í morgun að beita þurfi diplómatískum leiðum til að halda skipaleiðinni opinni. „Enginn vill stefna sínu fólki í hættu á Hormússundi. Við verðum að finna diplómatískar leiðir svo ekki komi til skorts á mat, áburði og orku,“ sagði Kallas. Utanríkismálaráðherrar ESB ræddu beiðni Trumps í gær og eftir þann fund sagði Kallas að sambandið væri þegar með aðgerðir á sjó til að vernda skipaumferð, meðal annars á Rauðahafi. Í umræðum utanríkisráðherra sambandsins hefði komið fram skýr vilji til að efla þær aðgerðir sem þegar væru í gangi en enginn áhugi væri, að svo komnu máli, á að útvíkka þær. Þó að Hormússund væri í brennidepli núna væri Rauðahaf enn mikilvægt. Enn væri hætta á að Hútar blönduðu sér í málin og því þyrfti að vera á varðbergi.