Umræðu um þingsályktunartillögu utanríkisráðherra um framhald aðildarviðræðna við Evrópusambandið lauk seint á ellefta tímanum í gærkvöld. Formaður utanríkismálanefndar stefnir á að málið gangi til síðari umræðu eftir sveitarstjórnarkosningar í maí. Umræðan stóð yfir í rúmlega 21 klukkustund. Til samanburðar stóð fyrri umræða við þingsályktunartillögu um aðildarumsókn að Evrópusambandinu árið 2009 yfir í 10 klukkustundir. Málið fer nú til utanríkismálanefndar áður en það kemur til síðari umræðu. „Við ætlum að taka okkur tíma fram að páskum til að eiga fundi með ráðherra og sérfræðingum ráðuneytisins. Síðan tekur við hefðbundið umsagnarferli og í kjölfarið eftir páska taka við stífar gestakomur og svo reikna ég með að tíminn í maí fari í að nefndin ráði ráðum sínum og afgreiði málið frá sér,” segir Pawel Bartoszek, formaður utanríkismálanefndar. Hlé verður gert á þingstörfum fyrri hlutann í maí vegna sveitarstjórnarkosninga og kemur þing saman að nýju eftir kosningar 18. maí. Þar sem fyrirhugað er að halda þjóðaratkvæðagreiðsluna 29. ágúst þarf lögum samkvæmt að vera búið að samþykkja tillöguna 29. maí. Samkvæmt starfsáætlun þingsins eru fimm þingfundardagar á tímabilinu 18. til 29. maí. Ræðutími í fyrri umferð var skammtaður en í síðari umferð gildir það sama og í annarri umræðu við frumvörp til laga sem þýðir að þingmenn geta talað svo dögum skiptir, ef svo ber undir. „Pressan er sannarlega til staðar en hún er tvíþætt. Vinnan í nefndinni, hún hagar sér eftir sínum lögmálum. Ég tel það vel raunhæft að nefndin nái að klára þetta mál á tilskildum tíma. Svo verður það að koma á daginn hvernig umræðan í þinginu verður. Hvort fólk telji það málstað sínum til framdráttar að stuðla að því að þessi atkvæðagreiðsla tefjist, að þjóðin fái að taka þessa ákvörðun eða ekki,” segir Pawel. Ræða bæði atkvæðagreiðslu og aðild Þótt þingsályktunartillagan snúist um hvort halda eigi þjóðaratkvæðagreiðslu um áframhald viðræðna snerist drjúgur hluti viðræðna um hvað efnislega fælist í aðild að ESB. Pawel gerir ráð fyrir að hvoru tveggja verði rætt í nefndinni. „Það er óumflúið að mínu mati að umræðan snúist að einhverju leyti um ESB-aðildina sjálfa og það væri óeðlilegt af formanni utanríkismálanefndar að loka á þær gestakomur.”