Цените на нафтата растат Филип Здравески 17.03.2026 / 19:24 Бизнис Цените на нафтата се искачија над 102 долара на меѓународните пазари, бидејќи шпекулациите за можно долгорочно нарушување на транзитот низ Ормускиот Проток ги надминаа иранските сигнали за пропуштање на танкери. На лондонскиот пазар, барелот се тргуваше за 1,96 долари попладне, во пораст од вчерашното затворање од 102,17 долари. На американскиот пазар, се зголеми за 1,67 долари на 95,17 долари. На почетокот на неделата, пазарите беа уверени од индикациите дека некои танкери сè уште минуваат низ Ормускиот Проток. Иран одобри премин на бродови од неколку земји низ теснецот, потврди портпаролот на иранското Министерство за надворешни работи, Есмаил Багаи. Техеран ја презеде контролата врз Ормускиот Проток по нападот на САД и Израел на 28 февруари, забранувајќи транзит за бродови поврзани со САД, Израел, европските земји и нивните партнери. Техеран дозволи поминување на два индиски танкери во сопственост на државната корпорација за бродови на Индија (SCI) кои превезуваат течен нафтен гас, под надзор на индиската морнарица, објави Times of India. Пакистански танкер кој превезува нафта натоварена во Обединетите Арапски Емирати (ОАЕ) исто така поминал, покажаа податоците од специјализирана компанија за следење на бродови. Ирак, исто така, постигна договор со Иран за да дозволи неколку танкери за нафта да поминат низ Ормускиот Проток, изјави ирачката новинска агенција INA, цитирајќи го министерот за нафта Хајан Абдул Гани во видео изјава. „САД немаат забелешки за тоа некои ирански, индиски и кинески бродови да поминат низ Ормускиот Проток“, изјави вчера американскиот министер за финансии Скот Бесент. „Иранските бродови поминале низ него и претходно, а ние го дозволивме тоа за да може остатокот од светот да биде снабден“, рече Бесент. Членовите на Меѓународната агенција за енергија (ИЕА) планираат да пуштат 400 милиони барели нафта и нафтени производи од резервите на пазарот. Доколку конфликтот продолжи, производството веројатно ќе биде дополнително намалено. ИЕА проценува дека производството во регионот на Персискиот Залив веќе е намалено за 8 милиони барели дневно. Одделни пресметки на Организацијата на земјите извознички на нафта (OPEC) покажуваат дека барел нафта од нејзините членки вчера бил поскап за 2,09 долари, на 128,99 долари. цена на горива Автор/Извор Макфакс/Кајгана Прикажи во метро On