93 տարեկան հասակում մահացել է Վրաց ուղղափառ եկեղեցու պատրիարք Իլյա Երկրորդը։ «Ազատության» վրացական ծառայության փոխանցմամբ՝ այս մասին հայտնել է պատրիարքական գահի տեղապահ, միտրոպոլիտ Շիո Մուջիրին։ Իլիա Երկրորդը Վրացական եկեղեցու առաջնորդն էր 1977 թվականից: 1957 թվականի ապրիլի 16-ին, 24 տարեկանում, նա ընդունել է վանական կարգ՝ ստանալով Իլյա անունը։ 1977 թվականի դեկտեմբերի 23-ին Թբիլիսիի Սիոնի տաճարում տեղի է ունեցել Վրաց ուղղափառ եկեղեցու 12-րդ ժողովը։ Այդ ժամանակ Սուխումի և Աբխազիայի եպիսկոպոսի պաշտոնը զբաղեցնող Իլյա Շիոլաշվիլին ընտրվել է եկեղեցու առաջնորդ։ Նա ստացել է Վրաստանի Կաթողիկոս-Պատրիարք, Մցխեթի և Թբիլիսիի արքեպիսկոպոս Իլիա Երկրորդի կոչումը, որին ավելի ուշ ավելացել է Պիցունդայի, Սուխումի և Աբխազիայի միտրոպոլիտ։