Shqipëria të mërkurën do të ndikohet nga kushte atmosferike të paqëndrueshme. Shërbimi Meteorologjik Ushtarak bën të ditur se moti parashikohet të jetë me vranësira mesatare deri të dendura. “Reshjet e shiut të herëpashershme me intensitet të ulët priten të jenë prezentë që në orët e para të 24-orëshit deri në orët e mesditës në pjesë të madhe të territorit. Pas orëve të mesditës reshjet e shiut me intensitet të ulët lokalizohen në jug dhe përgjatë relieveve malore të vendit deri në orët e vona të pasdites. Në mënyrë të izoluar dhe periudha afatshkurtra reshjet në formën e shtrëngatave”, thuhet në njoftim. Era do të fryjë me drejtim verilindje – juglindje me shpejtësi mesatare 6 m/s, përgjatë vijës bregdetare dhe në zonat luginore era me shpejtësi deri në 11 m/s. Deti - Valëzimi në detet Adriatik dhe Jon i forces 1-3 ballë. /Telegrafi/