Gjatë podcastit “Shëndeti në rend të parë”, e mbështetur nga United Hospital, gjinekologia Flora Belegu-Spahija ka sqaruar një nga pyetjet më të shpeshta që lidhet me Pap testin "nëse ai mund të kryhet edhe tek vajzat e reja që nuk kanë pasur marrëdhënie seksuale". Sipas saj, Pap testi zakonisht rekomandohet për gratë që kanë qenë seksualisht aktive. Gjinekologia tutje tha se kjo lidhet me mënyrën se si merret mostra për analizë. “Mostrat merren prej qafës së mitrës dhe për këtë nevojitet përdorimi i spekulumit. Tek vajzat që nuk kanë pasur marrëdhënie seksuale, kjo procedurë nuk preferohet”, shpjegon gjinekologia. Ajo shton se në këto raste mund të bëhen ekzaminime të tjera alternative, si strisho vaginale, por jo Pap test në formën standarde. “Pap testi është i domosdoshëm për gratë që kanë kryer marrëdhënie seksuale, pasi ndihmon në zbulimin e hershëm të ndryshimeve prekanceroze në qafën e mitrës”, thekson ajo. Për më shumë shikoni të plotë podcastin “Shëndeti në rend të parë”: - YouTube www.youtube.com