Երեւան: Մեդիամաքս: Մաքքեյնի ինստիտուտը հրապարակել է հունիսի 7-ին Հայաստանում կայանալիք խորհրդարանական ընտրությունների հետ կապված առաջարկություններ, որոնք կազմվել են փետրվարի 23-ից 26-ը Երեւան կատարած այցի արդյունքում։ Ինստիտուտի հաղորդագրության մեջ նշվում է, որ այցը տեղի է ունեցել հայաստանյան «Իրազեկ քաղաքացիների միավորում» հասարակական կազմակերպության աջակցությամբ։ «Առաքելության հիմնական եզրահանգումն այն է, որ Հայ առաքելական եկեղեցին նախընտրական շրջանում հանդես է գալիս որպես կենտրոնական քաղաքական դերակատար։ Եկեղեցին, որը պատմական եւ մշակութային պատճառներով վայելում է բնակչության լայն աջակցությունը, ներկայում գլխավորում է Գարեգին Բ Ամենայն Հայոց Կաթողիկոսը, ով ակտիվորեն հանդես է գալիս գործող վարչապետ Նիկոլ Փաշինյանի դեմ։ Մեկ այլ կարեւոր եզրակացությունն այն է, որ Հայաստանի պետական մարմինները չունեն բավարար ռեսուրսներ՝ Ռուսաստանի հիբրիդային սպառնալիքներին, ինչպես նաեւ քաղաքական դերակատարների կողմից կոռուպցիոն դրսեւորումներին արդյունավետորեն դիմակայելու համար», - ասված է հաղորդագրության մեջ։ «2023 թվականին Ադրբեջանի կողմից Լեռնային Ղարաբաղի գրավումից եւ դրան հաջորդած 2025 թվականի խաղաղության պայմանագրից հետո, որը կնքվեց ԱՄՆ միջնորդությամբ, հայերը դիտարկում են այս ընտրությունները որպես չափազանց կարեւոր քայլ խաղաղության եւ կայունության ճանապարհին։ Ինչպես Մոլդովայում, որտեղ Մաքքեյնի ինստիտուտը նախորդ տարի իրականացրել էր նմանատիպ առաքելություն, սպասվում է, որ ռուսական հիբրիդային պատերազմը զգալի սպառնալիք կներկայացնի ազատ եւ արդար ընտրություններ անցկացնելու Հայաստանի կարողության համար եւ կտարածի խաղաղության գործընթացի վերաբերյալ մոլորեցնող նարատիվներ, որոնք կարող են աղավաղել ընտրողների վարքագիծը», - հայտարարել է Մաքքեյնի ինստիտուտի գործադիր տնօրեն Էվելին Ֆարկասը։ Մաքքեյնի ինստիտուտը Հայաստանի կառավարությանը խորհուրդ է տալիս ստեղծել ընտրությունների հարցերով միջգերատեսչական աշխատանքային խումբ՝ «ծագող ընտրական ռիսկերին եւ սպառնալիքներին արագ ու համակարգված արձագանքելու համար», ուժեղացնել համագործակցությունը ԿԸՀ-ի եւ ՆԳՆ-ի միջեւ՝ արտերկրում Հայաստանի քաղաքացիներին վճարումներ կատարելու եւ քվեարկության նպատակով նրանց Հայաստան տեղափոխելու վերաբերյալ մեղադրանքների հետաքննության համար: Ամերիկյան վարչակազմին Մաքքեյնի ինստիտուտն առաջարկում է վերականգնել անկախ մեդիայի եւ քաղաքացիական հասարակության տեղական կազմակերպությունների «կրիտիկական կարեւորություն ունեցող ֆինանսավորումը», ներառյալ «Ամերիկայի ձայնի» եւ «Ազատություն» ռադիոկայանի ֆինանսավորումը: ԱՄՆ եւ եվրոպական կառավարություններին Մաքքեյնի ինստիտուտը խորհուրդ է տալիս ավելացնել տեխնիկական օգնությունը, ֆինանսավորումը եւ Հայաստանի իշխանությունների վերապատրաստումը՝ «օտարերկրյա հիբրիդային վտանգներից պաշտպանվելու համար», «կիրառել անհատական եւ ֆինանսական պատժամիջոցներ Հայաստանում հայտնի ռուսամետ գործիչների նկատմամբ», պատրաստվել «ընտրությունների արդյունքների հավանական վիճարկմանը»։ Մեդիամաքսը նշում է, որ Մաքքեյնի ինստիտուտի գործադիր տնօրեն Էվելին Ֆարկասը ժամանակին ԱՄՆ պաշտպանության փոխնախարարի օգնականն էր Ռուսաստանի, Ուկրաինայի եւ Եվրասիայի հարցերով եւ այդ կարգավիճակով 2013 թվականի դեկտեմբերին այցելել էր Հայաստան։ 2015 թվականին Էվելին Ֆարկասը գլխավորում էր ամերիկյան կողմը Վաշինգտոնում կայացած հայ-ամերիկյան պաշտպանական խորհրդակցությունների ժամանակ։