Rannsóknarnefnd sem skipuð verður til að rannsaka Bakkakotsmálið mun að öllum líkindum einnig skoða fósturheimili hér á landi með heildstæðum hætti. Þetta segir Páll Þórhallsson, lögfræðingur og skrifstofustjóri í forsætisráðuneytinu. Páll hefur umsjón með viðbrögðum ráðuneytisins við Bakkakotsmálinu. Páll segir um rannsóknarnefndina um Bakkakot í viðtali við fréttastofu: ,,Forsætisráðherra hefur í hyggju að leggja fram frumvarp seinna á þessu þingi, fyrir sumarið, þar sem komið yrði á laggirnar rannsóknarnefnd til að fjalla um fósturráðstafanir, eftirlit með þeim og Bakkakot sérstaklega. Það á eftir að afmarka nákvæmlega hvert verður viðfangsefnið. Tilefnið er auðvitað þetta Bakkakotsmál. En það er líklegt að það verði fleira undir, til dæmis í því formi að slík nefnd gæti tekið við ábendingum og þeim gögnum sem eru fyrirliggjandi um möguleg önnur tilefni og gert þá tillögur til stjórnvalda um frekari rannsóknir.“ Hann segir hins vegar að í slíkri rannsókn sé alltaf spurning hversu nálægt nútímanum eigi að fara. „Manni finnst það líklegt en síðan er auðvitað spurning hvað á að fara nálægt nútímanum. Það er ákveðið eftirlitskerfi við lýði í dag og menn sjá nú ekki fyrir sér að hlutverk þessarar rannsóknarefndar skarist við þær stofnanir sem eru starfandi í dag. Þannig að þetta taki þá fyrst og fremst til fósturheimila sem eru ekki lengur starfandi.“ Páll segir að munurinn á Bakkakoti og til dæmis vistheimilinu Breiðuvík sé að Bakkakot var einkaheimili sem tók að sér fósturbörn. Breiðavík var vistheimili, stofnun. Páll segir að vegna þessa lúti rannsókn á Bakkakoti öðrum viðmiðum. Rætt er við Pál í fréttaskýringaþættinum Þetta helst í dag og fjallað um næstu skref í Bakkakotsmálinu.  Þáttinn má hlusta á hér: Lögfræðingurinn Páll Þórhallsson heldur utan um viðbrögð íslenska ríkisins við Bakkakotsmálinu. Hann segir að verið sé að hugleiða hvernig rannsóknin á fósturheimilinu muni fara fram og hvort hún verði ekki líka heildstæð rannsókn á fósturheimilum. Ákveðið var að rannsaka fósturheimili ekki sérstaklega Einn og hálfur mánuður er frá því að umfjöllun um Bakkakotsmálið var birt í fréttaskýringaþættinum Kveik. Þátturinn vakti mikla athygli. Drengir sem voru vistaðir á fósturheimilinu Bakkakoti í æsku stigu fram og sögðu frá ýmiss konar ofbeldi sem þeir urðu fyrir, bæði barsmíðum og kynferðisofbeldi. Drengirnir sögðu annan húsráðandann í Bakkakoti, Þóru Bernódusdóttur, hafa beitt þá þessu ofbeldi. Kristrún Frostadóttir forsætisráðherra boðaði í kjölfarið ferns konar aðgerðir til að bregðast við málinu. Í fyrsta lagi að vistbörnum sem bjuggu í Bakkakoti yrði veitt aðstoð; Í öðru lagi að aðstæður í Bakkakoti yrðu rannsakaðar; í þriðja lagi að aðstæður fósturbarna í nútímanum yrðu rannsakaðar og í fjórða lagi að íslenska ríkið myndi skoða sanngirnisbætur til þeirra sem dvöldu í Bakkakoti. Ekki hefur legið fyrir með hvaða hætti rannsóknin á Bakkakoti á að fara fram og hvort þessi rannsókn feli í sér heildstæðari rannsókn á fósturheimilum á Íslandi. Þetta er ennþá til skoðunar segir Páll. Páll segir aðspurður um hvort sá möguleiki sé ekki fyrir hendi að önnur vistheimili með sambærilegum sögum og frá Bakkakoti hafi verið starfandi að hingað til hafi rannsóknir opinberra aðila beinst að stofnunum sem vistuðu börn en ekki einkaheimilum eins og Bakkakoti. Hann segir að nú sé þetta hins vegar breytt með tilkomu rannsóknarinnar fyrirhuguðu á Bakkakoti. Fyrri rannsóknir eins og á Breiðuvík og Kumbaravogi hafi snúist um vistheimili sem voru stofnanir og að menn hafi ákveðið að láta staðar numið þar og ekki leggjast í rannsóknir á einkaheimilum sem vistuðu börn. „Ástæðan var sú að menn töldu að það væri svo erfitt um vik. Bæði erfiðara að afla upplýsinga um það sem gerðist í raun á slíkum heimilum og að þarna væru líka í húfi kannski réttindi og friðhelgi heimilis, og réttindi heimilismanna. Og við stöndum vissulega frammi fyrir þessu núna líka. En ríkisstjórnin ákvað að taka af skarið og lýsa því yfir að þetta yrði rannsakað samt sem áður. Vitandi það auðvitað hvað þetta er viðkvæmt og það þarf auðvitað að útfæra lagaheimild og verkefni rannsóknarnefndar með tilliti til þessarar sérstöðu. Þannig að það kunna að hafa verið ábendingar sem hafa borist í gegnum tíðina sem að menn hafa kannski sett í þennan flokk sem við ætluðum ekki að fara að kafa ofan í. En núna þegar búið er að opna á rannsókn á Bakkakoti þarf að gæta jafnræðis.“ Orð Páls má túlka þannig að fyrst rannsaka eigi Bakkakot sérstaklega og mögulega greiða sanngirnisbætur til þeirra sem þar dvöldu þá þurfi hið sama að gilda um önnur fósturheimili þar sem börn voru mögulega beitt harðræði.