ខេត្ត​ក្រចេះ​៖​ លោក នេត្រ ភក្រ្តា រដ្ឋមន្រ្តីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះបានចុះពិនិត្យ និងផ្តល់អនុសាសន៍ក្នុងការថែទាំ កែលម្អ ជួសជុលសំណង់ប្រវត្តិសាស្ត្រ​​ «ផ្ទះសសរ១០០»​ ក្នុងខេត្តក្រចេះ។  អនុសាសន៍ត្រូវបានធ្វើឡើងក្នុងឱកាស ដែល​លោករដ្ឋមន្ត្រី​ អញ្ជើញជាអធិបតីភាពបើកកិច្ចប្រជុំបូកសរុបសកម្មភាព និងលទ្ធផលការងារចុះមូលដ្ឋានឆ្នាំ២០២៥ និងលើកទិសដៅការងារបន្តសម្រាប់ឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ឋានខេត្តក្រចេះ កាលពីថ្ងៃទី១៦ ខែមីនា ឆ្នាំ២០២៦។ បន្ទាប់ពីបានចុះពិនិត្យផ្ទះផ្ទាល់ លោករដ្ឋមន្ត្រី​ ក៏បានផ្តល់អនុសាសន៍មួយចំនួនក្នុងការកែលម្អរបន្ថែម ដើម្បីរក្សាមរតកបុរាណ និងទាក់ទាញភ្ញៀវទេសចរជាតិនិងអន្តរជាតិ។ ផ្ទះសសរ១០០ មានវ័យជាង១០០ឆ្នាំ មានទីតាំងស្ថិតនៅវិហាររកាកណ្ដាល សង្កាត់រការកណ្ដាល ក្រុងក្រចេះ។ ផ្ទះចំណាស់នេះ ជាទីតាំងទេសចរណ៍ដ៏គួរឱ្យទាក់ទាញមួយ នៅក្នុងខេត្តក្រចេះ។ ផ្ទះនេះត្រូវបាន មន្ទីរវប្បធម៌ និងវិចិត្រសិល្បៈខេត្តក្រចេះ រៀបចំសាងសង់ឡើងវិញ ក្រោយពេលម្ចាស់ផ្ទះបរិច្ចាគជូន នៅឆ្នាំ២០២០។  ផ្ទះសសរ ១០០ បច្ចុប្បន្ននៅសល់សសរតែ៤០ដើមប៉ុណ្ណោះ ដោយសារតែសសរផ្សេងៗទៀតមានសភាពទ្រុឌទ្រោម ហើយត្រូវបានគេដកចេញ។ សម្ភារបុរាណមួយចំនួន ត្រូវបានរក្សាទុក ដូចជាគ្រឿងសង្ហារឹម គ្រឿងតម្បាញ ព្រះគណេស កណ្តៀវ និងសម្ភារប្រើប្រាស់ផ្សេងៗទៀត ដើម្បីឱ្យភ្ញៀវទេសចរឡើងទៅទស្សនា៕ដោយ​៖តារា​ រូបថត៖ ខឹម សុវណ្ណារ៉ា