Երեւան: Մեդիամաքս: Հայաստանի վարչապետ Նիկոլ Փաշինյանն ասել է, որ «մենք պետք է վերջ տանք դեգերումներին եւ պանդխտությանը»: Կառավարությունից հայտնում են, որ այդ մասին նա մարտի 18-ին ասել է՝ ելույթ ունենալով «Ներառական զարգացում. ձեռքբերումներ եւ անելիքներ» խորագրով համաժողովին, որը նվիրված էր Արցախից տեղահանվածների հիմնախնդիրներին եւ դրանց լուծման քայլերին։ «Մենք դեգերումներին պետք է վերջ տանք, պանդխտությանը պետք է վերջ տանք: Մենք ունենք դուք, դուք ունեք պետություն, եւ այդ պետությունը Հայաստանի Հանրապետությունն է։ Մեր ամբողջ ռազմավարությունը հիմնվում է դրա վրա, որ դուք տնավորվեք, բառիս եւ՛ ֆիզիկական, եւ՛ հոգեբանական իմաստով, Հայաստանի Հանրապետությունում։ Եվ մենք իրար հետ մեր այս պետությունը, որը մեծ բարեբախտություն է մեզ համար, հայ ժողովրդի համար, դարձնենք ավելի բարեկեցիկ, ավելի ապահով, ավելի անվտանգ եւ ի վերջո՝ կարողանանք գոյատեւման տրամաբանությունից դուրս գալ զարգացման եւ բարեկեցության տրամաբանություն, խաղաղության տրամաբանություն: Ես կարծում եմ, որ մենք պետք է կենտրոնանանք հենց այդ խնդիրների լուծման վրա», - ասել է վարչապետը: «Ես շատ կարեւոր եմ համարում, որ մենք օգնենք Ղարաբաղից տեղահանված մեր քույրերին եւ եղբայրներին, որ հոգեբանական այդ փնտրտուքի վիճակից դուրս գան։ Կարծում եմ՝ պետք է կենտրոնանանք նրա վրա, որ օգնենք, ամեն ինչով աջակցենք, որ նախ՝ ստանան Հայաստանի Հանրապետության քաղաքացիություն, երկրորդ՝ տնավորվեն Հայաստանի Հանրապետությունում եւ իրենց ու իրենց ընտանիքների ճակատագիրը հարատեւ կապեն Հայաստանի Հանրապետության հետ։ Սա շատ կարեւոր է եւ՛ քաղաքական, եւ՛ հոգեբանական առումով»,- ասել է Նիկոլ Փաշինյանը։ Նա տեղեկացրել է, որ 2023 թվականից ի վեր Հայաստանի պետական բյուջեից տարբեր ծրագրերով շուրջ 145 միլիարդ դրամ է հատկացվել Ղարաբաղից տեղահանվածների կարիքները հոգալու համար։ Ըստ նրա, կառավարությունը հասել է մի հանգրվանի, որ պետք է ամփոփի այդ ուղղությամբ կատարած աշխատանքների նախորդ փուլի արդյունքները եւ արձանագրի առաջիկա անելիքները։ Նիկոլ Փաշինյանը նաեւ նկատել է. «Կարեւոր է, որ մեր որոշումները, խոսույթները, մեր կողմից իրականացվող արտաքին եւ տարածաշրջանային քաղաքականություններին չհակասեն։ Մենք այսօր Ադրբեջանի հետ հաստատել ենք խաղաղության եւ չենք կարող կայացնել որոշումներ, որոնք այդ հաստատված խաղաղությունը կխարխլեն, կփլուզեն, մեզ կվերադարձնեն կոնֆլիկտի տրամաբանության մեջ»։