Հունիսի 7-ին Հայաստանում կայանալիք Ազգային ժողովի ընտրություններին ընդառաջ Մեդիամաքս մեդիա-ընկերության մեդիայի մոնիտորինգի եւ վերլուծության MaxMonitor համակարգը մշակել է «2026թ. ԱԺ ընտրություններ» միասնական նախագիծը, որից առաջարկում է օգտվել Կենտրոնական ընտրական հանձնաժողովին, ընտրություններին մասնակցող քաղաքական ուժերին, պետական մարմիններին, դիտորդական առաքելություններին, միջազգային կազմակերպություններին: «Ընտրություններից առաջ շատ կարեւոր է ունենալ մեդիայի աշխատանքին օպերատիվ հետեւելու անկախ գործիքներ, որոնք չեն գտնվում կառավարության, տեղական կամ արտասահմանյան քաղաքական ուժի վերահսկողության ներքո», - ասել է Մեդիամաքս մեդիա-ընկերության տնօրեն Արա Թադեւոսյանը: MaxMonitor համակարգի ղեկավար Օֆելյա Ղազարյանը մանրամասնել է. «Ընտրական գործընթացի բոլոր մասնակիցներին տրամադրում ենք լուծում, որը, նախ եւ առաջ, հսկայական ժամանակ է տնտեսելու տեղեկատվության հետ աշխատող իրենց թիմերի համար: Բոլորի համար ապահովելու ենք նույն պայմանները: «2026թ. ԱԺ ընտրություններ» միասնական նախագիծը հետեւում է նույն բանալի-բառերին (ընտրությունների մասնակցելու հայտ ներկայացրած քաղաքական ուժեր)՝ նույն լրատվամիջոցների ցանկով (ավելի քան 150 անվանում): Մեր կարծիքով, այս հանգամանքը կարող է նաեւ որոշակի զսպող դեր խաղալ եւ քաղաքական ուժերին դրդի ավելի քաղաքակիրթ պայքար մղել»: Արա Թադեւոսյանը հավելել է, որ ընտրությունների համատեքստում MaxMonitor-ը եւս մի կարեւոր առավելություն ունի՝ եթե նյութը այս կամ այն պատճառով հեռացվում է լրատվական կայքից, այն պահպանվում է համակարգի բազայում եւ որոշ դեպքերում կարող է ապացույց հանդիսանալ: MaxMonitor համակարգում ստեղծված «2026թ. ԱԺ ընտրություններ» նախագծի համար սահմանվել է միասնական գին՝ ամսական 48 000 դրամ (ԱԱՀ ներառյալ), որը գործելու է բոլորի համար՝ քաղաքական ուժեր, պետական մարմիններ, դիտորդական առաքելություններ, միջազգային կազմակերպություններ եւ այլն: «Եթե լինեն կազմակերպություններ, որոնք ցանկություն կունենան բազային նախագծից բացի օգտվել MaxMonitor-ի հավելյալ, մասնավորապես,  վերլուծական հնարավորություններից, դա կարող ենք առանձին քննարկել եւ ապահովել անհրաժեշտ գործիքակազմը», - հավելել է Օֆելյա Ղազարյանը: MaxMonitor համակարգում ստեղծված «2026թ. ԱԺ ընտրություններ» նախագծի մասին հավելյալ տեղեկություններ ստանալու կամ բաժանորդագրություն ձեւակերպելու համար կարող եք զանգահարել 043856565 հեռախոսահամարով կամ գրել ofelia.ghazaryan@mediamax.am էլ. փոստին: