Пет моќни европски земји и Јапонија: Подготвени сме да придонесеме за обезбедување на Ормускиот Проток Филип Здравески 19.03.2026 / 20:18 Свет Водечките европски земји и Јапонија денеска издадоа заедничка изјава во која се вели дека се подготвени да се приклучат на соодветни напори за да се обезбеди безбеден премин низ Ормутскиот Проток и да преземат чекори за стабилизирање на енергетските пазари. Текстот го потпишаа Обединетото Кралство, Франција, Германија, Италија, Холандија и Јапонија. Претходно, овие земји поединечно изјавија дека не планираат воено да интервенираат и да се приклучат на војната што ја водат САД и Израел против Иран. „Најостро ги осудуваме неодамнешните напади на Иран врз невооружени комерцијални бродови во Заливот, нападите врз цивилната инфраструктура, вклучувајќи ги и нафтените и гасните постројки, како и фактичкото затворање на Ормутскиот Проток од страна на иранските сили. Изразуваме длабока загриженост за ескалацијата на конфликтот. Го повикуваме Иран веднаш да ги прекине своите закани, поставување мини, напади со беспилотни летала и ракети и други обиди за блокирање на теснецот за комерцијален превоз и да се придржува до Резолуцијата 2817 на Советот за безбедност на Обединетите нации“, се вели во неа. Наведуваат дека слободата на навигација е фундаментален принцип на меѓународното право, вклучително и според Конвенцијата на Обединетите нации за правото на морето, и дека последиците од дејствијата на Иран ќе ги почувствуваат луѓето во сите делови на светот, особено најранливите. „Во согласност со Резолуцијата 2817 на Советот за безбедност на ОН, нагласуваме дека таквото мешање во меѓународната навигација и нарушувањето на глобалните синџири за снабдување со енергија претставуваат закана за меѓународниот мир и безбедност. Во овој поглед, повикуваме на итен, сеопфатен мораториум за напади врз цивилната инфраструктура, вклучувајќи ги и нафтените и гасните постројки. Изразуваме подготвеност да придонесеме за соодветни напори за обезбедување безбеден премин низ теснецот. Ја поздравуваме посветеноста на државите што учествуваат во планирањето на подготвеноста“, рекоа тие. Понатаму наведуваат дека ја поздравуваат одлуката на Меѓународната агенција за енергија да одобри координирано ослободување на стратешките резерви на нафта. „Ќе преземеме други чекори за стабилизирање на енергетските пазари, вклучително и соработка со одредени земји производители за зголемување на производството. Исто така, ќе работиме на обезбедување поддршка на најпогодените земји, вклучително и преку Обединетите нации и меѓународните финансиски институции (МФИ). Поморската безбедност и слободата на пловидба им користат на сите земји. Ги повикуваме сите земји да го почитуваат меѓународното право и да ги почитуваат основните принципи на меѓународен просперитет и безбедност“, порачаа шесте држави. Ормуски Проток Автор/Извор Ф.З. Прикажи во метро On