Երեւան: Մեդիամաքս: ԵՄ ընդլայնման հարցերով հանձնակատար Մարթա Կոսը եւ Հայաստանի փոխվարչապետ Մհեր Գրիգորյանը վերահաստատել Հայաստան-ԵՄ գործընկերությունը խորացնելու հանձնառությունը՝ մայիսի 5-ին Երեւանում կայանալիք Հայաստան-ԵՄ «առաջին պատմական գագաթաժողովի» նախօրեին: Կոսի եւ Գրիգորյանի համատեղ հայտարարությունում ասվում է, որ «գագաթաժողովը կարտացոլի քաղաքական երկխոսությունը խորացնելու, տնտեսական համագործակցությունը եւ ոլորտային ինտեգրումը ամրապնդելու, ինչպես նաեւ տարածաշրջանում խաղաղության, կայունության եւ ժողովրդավարական դիմացկունության առաջմղմանը նպաստելու հանձնառությունը»: Մարթա Կոսը ողջունել է վերջին ամիսներին հայ-ադրբեջանական հարաբերություններում ձեռք բերված «զգալի առաջընթացը», ինչպես նաեւ Հայաստանի շարունակական ջանքերը Թուրքիայի հետ հարաբերությունների կարգավորմանը հասնելու համար: «ԵՄ-ն վճռականորեն աջակցում է Հայաստանի եւ Ադրբեջանի միջեւ հարաբերությունների կարգավորման գործընթացին եւ պատրաստ է ներդրումներ կատարել ներառական տարածաշրջանային փոխկապակցվածության մեջ՝ տարածաշրջանը կայուն խաղաղությանը, կայունությանն ու բարգավաճմանը մոտեցնելու համար», - ասվում է փաստաթղթում: Հայտարարությունում նշվում է, որ Հայաստանը միակ երկիրն է, որը ԵՄ-ի հետ վիզաների ռեժիմի ազատականացման վերաբերյալ ակտիվ երկխոսություն է վարում: «Հայաստանում խորհրդարանական ընտրությունների նախօրեին հանձնակատար Կոսը շեշտել է հայկական ժողովրդավարական ինստիտուտներին աջակցության կարեւորությունը՝ պաշտպանելու ընտրությունների ազնվությունը եւ ինքնիշխան ընտրություն կատարելու քաղաքացիների կարողությունը», - ասվում է փաստաթղթում: Մարտի 19-ին Մարթա Կոսի հետ կայացած հանդիպմանը Հայաստանի վարչապետ Նիկոլ Փաշինյանը վերահաստատել է կառավարության հանձնառությունը՝ շարունակելու ժողովրդավարական բարեփոխումները, ամրապնդելու օրենքի գերակայությունը եւ զարգացնելու ինստիտուցիոնալ կարողությունները։ «Մարթա Կոսը շնորհակալություն է հայտնել ընդունելության համար եւ նշել, որ ԵՄ-ն բարձր է գնահատում Հայաստանի կողմից իրականացվող բարեփոխումները եւ դրանց ուղղությամբ դրսեւորվող քաղաքական կամքը։ Նա ընդգծել է, որ ԵՄ-ն շարունակելու է աջակցել Հայաստանին երկկողմ համագործակցության, մասնավորապես, բարեփոխումների օրակարգին, Հայաստանի քաղհասարակությանն ու ԶԼՄ–ներին», - հայտնում են կառավարությունից: