Արդարադատության նախարարությունը հերքում է, որ ավելի վաղ լրատվամիջոցներում հրապարակված նախագիծը իրենց մշակած վերջնական տեքստն է: Միևնույն ժամանակ ո՛չ հերքում, ո՛չ հաստատում են, որ իրենց մշակված տեքստից հանվել է հղումն Անկախության հռչակագրին: «Դա այն տեքստը չէ, որը մենք պետք է հրապարակենք: Մենք նոր տեքստ ենք հրապարակելու, ոչ թե Սահմանադրության փոփոխությունների», - «Ազատության» հետ զրույցում պնդեց արդարադատության նախարարի մամուլի քարտուղարը: «Իշխանություն» լրատվականն այսօր պնդեց, որ «իր ձեռքի տակ է հայտնվել ՀՀ Սահմանադրության փոփոխված տարբերակը»: Այս լրատվականի հրապարակած տեքստի նախաբանից բացակայում է Հայաստանի ու ԼՂ-ի միավորման մասին ձևակերպում պարունակող Անկախության հռչակագրին հղումը: Մարիամ Մելքումյանը չպատասխանեց հարցին՝ արդյոք Անկախության հռչակագրին հղումը նախարարության մշակած նախագծում հանվե՞լ է: Ասաց՝ օրվա ընթացքում հանդես կգան հավելյալ պարզաբանմամբ: Անկախության հռչակագիրը Սահմանադրությունից հանել պահանջում է Ադրբեջանը՝ պնդելով, որ միայն դրանից հետո Հայաստանի հետ կստորագրի խաղաղության համաձայնագիրը: Անձամբ Նիկոլ Փաշինյանն է հռչակագիրը կոնֆլիկտածիրն որակել, կարծիք հայտնել, որ նոր Սահմանադրության նախագծում Անկախության հռչակագիրը չպետք է հիշատակվի, բայց տեքստը մշակող Արդարադատության նախարարությունը, այնուհանդերձ, պահում է գլխավոր ինտրիգը՝ հանելո՞ւ, թե՞ պահելու են հղումը: