Bandarísk stjórnvöld íhuga nú að aflétta viðskiptaþvingunum af íranskri olíu sem er þegar farin af stað frá landinu. Scott Bessent fjármálaráðherra Bandaríkjanna sagði þetta í viðtali á sjónvarpsstöðinni Fox. Með þessu væri hægt að auka olíu á markaðnum, sem myndi þá lækka verðið. Bessent segir þessa olíu nema alls 140 milljónum tunna. Hann metur það sem svo að olíuverð myndi lækka í 10-14 daga og aðgengi að olíu til þeirra sem þyrftu mest á henni að halda verði auðveldara – þar nefnir hann sérstaklega sem dæmi Indland, Japan og Malasíu. Hann upplýsti hins vegar ekki um nein smáatriði. Donald Trump tjáði sig ekki beint um þessa hugmynd í samtali við fréttamenn í gærkvöld, en sagði þó að allt yrði gert til að halda olíuverðinu niðri. Snarhækkandi olíuverð vegna stríðsins í Íran hefur vakið áhyggjur stjórnvalda víða um heim sem íhuga ýmiss konar aðgerðir. Þessi hugmynd hefur hins vegar komið mörgum sérfræðingum í opna skjöldu, enda er hún á skjön við þá utanríkisstefnu sem Bandaríkin hafa rekið í áratugi. „Svo það sé orðað hóflega, þetta er snargalið,“ sagði David Tannenbaum, framkvæmdastjóri ráðgjafafyrirtækisins Compliance Services við breska ríkisútvarpið, BBC. Fyrirtækið sérhæfir sig í viðskiptaþvingunum gagnvart skipum. „Þetta þýðir að við myndum leyfa Íran að selja olíu, sem myndi hjálpa þeim að fjármagna stríðið.“ Aðrir sérfræðingar segja ólíklegt að þetta hefði mikil áhrif á olíuverð. Þessi tillaga kemur í framhaldi af þeirri ákvörðun Bandaríkjamanna að aflétta að hluta viðskiptaþvingunum af rússneskri olíu í síðustu viku, nokkuð sem evrópskir leiðtogar gagnrýndu harðlega.