Наврўз халқимизнинг энг қадимий ва ҳаётбахш байрамларидан бири сифатида асрлар давомида инсонни табиат, жамият ва тарих билан боғлаб келаётган маънавий ҳодисадир. Унинг моҳиятида фақат фасл алмашинуви эмас, балки яшариш, руҳий покланиш, меҳр-оқибат, мурувват, саховат ва меҳнацеварлик каби юксак қадриятлар мужассам. Шунинг учун ҳам Наврўз халқ хотирасида оддий тантана эмас, балки эзгуликни улуғлайдиган, инсонни яратувчанликка чорлайдиган, жамиятни бирлаштирадиган маънавий тажриба сифатида яшаб келмоқда.