Samfylkingin hélt flokksstjórnarfund í dag þar sem meðal annars voru kynntar áherslur fyrir sveitarstjórnarkosningarnar 16. maí. Í ræðu sinni sagði Kristrún Frostadóttir, formaður Samfylkingarinnar, að áherslur flokksins sneru meðal annars að auknu samstarfi ríkis og bæja. Þessar áherslur væru til komnar eftir að efnt var til opinna funda í sveitarfélögum og var afrakstur þeirra kjarnaður í þrjú samvinnuverkefni með yfirskriftina : Tökum ábyrgð hvert á öðru: „Samvinnuverkefnin þrjú eru í fyrsta lagi að lækka kostnað barnafólks, meðal annars með þaki á leikskólagjöldum og lögfestingu á rétti til leikskólavistar frá lokum fæðingarorlofs í skrefum, með sameiginlegri fjármögnun ríkis og sveitarfélaga,“ sagði Kristrún í ræðu sinni. „Í öðru lagi leggur Samfylkingin áherslu á að við hlúum að fólkinu sem byggði landið. Með áframhaldandi þjóðarátaki í umönnun eldra fólks, þar sem við eyðum biðlistanum eftir hjúkrunarrýmum árið 2030, sem tvöfaldaðist frá árinu 2017, sagði Kristrún sem tók einnig fram að stax yrði hafist handa við að stórefla þjónustu við eldra fólk í heimahúsum. „Og síðast en ekki síst viljum við auðvelda rekstur og uppbyggingu með því að gera það sama í sveitarstjórnum og við höfum á okkar fyrsta ári í ríkisstjórn: Hrista upp í kerfinu og ráðast í markvissa einföldun regluverks til að liðka fyrir framtaki og verðmætasköpun,“ sagði Kristrún. Unnið að því að kæla efnahagskerfið Í ræðu sinni talaði Kristrún einnig um efnahagsmálin og þeim áföngum sem ríkisstjórnin hefði náð. „Á rúmlega einu ári í ríkisstjórn höfum við: lögfest stöðugleikareglu, ráðist í tiltekt og hagræðingu í ríkisrekstri, lækkað skuldir ríkisins um 7,5% af landsframleiðslu og lagt fram fjármálaáætlun um hallalaus fjárlög 2027 — í fyrsta skipti í að verða áratug — eins og við sögðumst ætla að gera, sagði Kristrún. Þá benti hún einnig á að dregið hafi verið úr hvata til að safna íbúðum á fáar hendur, gerðar voru breytingar á hlutdeildarlánakerfinu og tekið á Airbnb. „Við erum að kæla kerfið þannig að það virki betur fyrir venjulegt fólk. Við drögum úr vægi verðtryggingar frá og með næstu áramótum. Og annar húsnæðispakkinn er handan við hornið,“ sagði Kristrún. Kristrún kom einnig inn á vaxandi verðbólgu og nýlega hækkun stýrivaxta sem tilkynnt var í vikunni. „Ég hef verið hreinskilin varðandi efnahagsmálin. Og ég viðurkenni það að síðasta haust, eftir 2% lækkun stýrivaxta á einu ári, 5 vaxtalækkanir í röð og lægstu verðbólgumælingu í 5 ár, þá vorum við vongóð. Og það hefur komið á daginn að við freistuðumst til að fagna of snemma á þeim tímapunkti,“ sagði Kristrún sem nýtti einnig tækifærið til að skjóta skotum að fyrri ríkisstjórn og tók fram að ekki kæmi til greina að hverfa aftur til þeirrar efnahagsstjórnar sem hefði fært landinu 10% verðbólgu og 9,25% vexti. „Og nei, það kemur ekki til greina að dusta rykið af áætlunum fyrri ríkisstjórnar um áframhaldandi hallarekstur ríkisins út þetta ár og það næsta,“ sagði Kristrún. Mikilvægt að halda möguleikum um ESB-aðild opnum Kristrún kom einnig inn á eitt stærsta hitamál líðandi stundar sem er komandi þjóðaratkvæðagreiðsla um það hvort hefja eigi aðildarviðræður við Evrópusambandið aftur. Þið vitið nákvæmlega hvar ég stend í þessu máli og það hefur legið fyrir alveg frá því að ég hóf mína þátttöku í pólitík: Ég er Evrópusinni sjálf en ég er jafnaðarmaður fyrst og fremst. Ég sýni fólki fullan skilning sem hefur efasemdir um að hagsmunum Íslands sé best borgið innan Evrópusambandsins, sagði Kristrún sem taldi mikilvægt að möguleikanum á aðild að sambandinu væri haldið opnum. „Ég held að það geti verið gluggi núna fyrir Ísland til að nýta tækifærin sem geta falist í þeirri stöðu sem nú er uppi í Evrópu og í alþjóðamálunum. Og ég tel að við ættum að minnsta kosti að halda því opnu að kanna nánar kostina sem kunna að felast í aðild að Evrópusambandinu,“ sagði Kristrún.