Beinagrindur frá tímum Galla sem fundist hafa í frönsku borginni Dijon vekja áleitnar spurningar meðal vísindamanna um greftrunarsiði þjóðflokksins. Börn að leik á skólalóð í Dijon fundu nýverið merkilega vel varðveitta beinagrind af karlmanni sitjandi í hringlaga gryfju og andlitið sneri til vesturs. Hendurnar hvíla í kjöltu beinagrindarinnar sem talin er vera frá árunum þrjú til tvö hundruð fyrir okkar tímatal. Margar samskonar beinagrindur hafa fundist í borginni og vísindamenn vilja átta sig á hví fólkið var jarðsett með þessum hætti og jafnvel hvort það hafi verið grafið lifandi. Hvort greftrunin hafi verið refsing eða verðlaun hinna voldugu, nokkrar beinagrindanna sýna merki ofbeldis og á einni má sjá banvænan höfuðáverka. Allar beinagrindurnar eru af fullorðnum karlmönnum og ein tilheyrði barni. Þær eru vel tenntar en sýna flestar merki um slitgigt sem bendir til mikils líkamlegs álags í lifanda lífi. Um það bil 75 grafir sitjandi Galla hafa fundist víða um Evrópu og tuttugu þeirra í Dijon. Enga persónulega muni er að finna í gröfunum utan eins armbands. Fátt er vitað um menningu Galla, þjóðflokksins sem fyrst kom fram á sjónarsviðið á fimmtu öld fyrir okkar tímatal, annað en það sem aðrir hafa skrifað um þá. Vísindamenn telja slagsíðu geta verið í þeirri umfjöllun, til dæmis úr ranni keisarans Júlíusar Sesar sem lagði Gallíu undir sig árið fimmtíu fyrir okkar tímatal. Flestir kannast við Galla úr bókunum um Ástrík og Steinrík en þjóðflokkurinn byggði landsvæði sem náði yfir hluta Frakklands nútímans, Belgíu, Sviss og eitthvað austur fyrir.