Rúmlega 500 starfsmenn hjá mannréttindaskrifstofu Sameinuðu þjóðanna hafa skrifað undir bréf til Volker Türk, mannréttindastjóra SÞ, þar sem hann er hvattur til að nota hugtakið þjóðarmorð til að lýsa ástandinu á Gaza. Starfsfólkið segir skýrslur bæði stofnana á vegum Sameinuðu þjóðanna og óháðra sérfræðinga sýna fram á að skilyrði fyrir notkun hugtaksins samkvæmt lagalegri skilgreiningu séu uppfyllt. „Mannréttindaskrifstofu Sameinuðu þjóðanna ber bæði lagaleg og siðferðileg skylda til að fordæma þjóðarmorð,“ stendur í bréfinu. „Að fordæma ekki þjóðarmorð í framkvæmd grefur undan trúverðugleika Sameinuðu þjóðanna og mannréttindakerfinu sem slíku.“ Höfundar bréfsins hvöttu Sameinuðu þjóðirnar til að endurtaka ekki söguleg mistök og bentu á að gjarnan hefði verið bent á „þögn“ SÞ í þjóðarmorðinu í Rúanda árið 1994 sem eitt versta siðferðislega feilspor stofnunarinnar. „Ég veit að réttlætiskennd okkar allra er misboðið vegna hryllingsins sem við erum vitni að og að við finnum fyrir gremju í ljósi vanmættis alþjóðasamfélagsins til að binda enda á þessar aðstæður,“ hafði fréttastofa Reuters eftir Türk um bréfið. Hann hvatti starfsfólkið til að sýna samheldni frammi fyrir áskorunum sem steðja að stofnuninni.