Karl Ingi Vilbergsson, saksóknari hjá embætti héraðssaksóknara gerir kröfu að öll þau fimm, sem ákærð eru í Þorlákshafnarmálinu verði dæmd fyrir þau brot sem þeim er gefið að sök og að þau greiði allan sakarkostnað, sem nemur á fjórðu milljón króna. Öllum nema 18 ára pilti, sem er ákærður fyrir peningaþvætti, verði gert að greiða skaðabætur. Karl Ingi sækir málið í munnlegum málflutningi sem nú stendur yfir í héraðsdómi Suðurlands. Farið er fram á ekki skemur en 16 ára fangelsisvist yfir þremur sakborningum í Þorlákshafnarmálinu. Stefáni Blackburn Lúkasi Geir Ingvarssyni Matthíasi Birni Erlingssyni vegna aðildar þeirra að andláti Hjörleifs Hauks Guðmundssonar sem numinn var á brott af heimili sínu í Þorlákshöfn 10. mars og fannst síðan illa haldinn við göngustíg í Gufunesi næsta morgun og lést á Landspítala skömmu síðar. Saksóknari fór þess síðan á leit við dómara að farið yrði yfir þetta hámark - það er að vegna eðlis brotanna yrði farið yfir 16 ár í tilfelli þeirra Lúkasar og Stefáns. Gæsluvarðhald komi til frádráttar. Þeir voru ennfremur ákærðir fyrir frelsissviptingu, fjárkúgun og rán og saksóknari fór fram á að þeir yrðu sakfelldir fyrir öll brotin. Saksóknari sagði rétt að líta til ungs aldurs Matthíasar og honum yrði veittur afsláttur af refsingu. Hann sagði Stefán eiga 18 ára langan sakaferil sem næði aftur til ársins 2007, en hefði síðast verið dæmdur fyrir ofbeldisbrot 2014. Svo virtist sem hann hefði snúið við blaðinu. Saksóknari sagði að fyrir lægi að Stefán og Lúkas hefðu játað aðrar sakir en manndráp, Matthías hefur alfarið neitað sök. Hann vísaði í myndband, sem sýnt var í dómsal á fyrsta degi aðalmeðferðar, en þar voru ferðir og ýmsar athafnir ákærðu sýndar, meðal annars með því að styðjast við upptökur úr öryggis- og eftirlitsmyndavélum og farsímagögn. Þar sæist að Hjörleifur heitinn hefði farið fullfrískur af heimili sínu að kvöldi 10. mars, en síðan fundist nær dauða en lífi í Gufunesi morguninn eftir. Hann lést svo á Landspítala skömmu síðar. „Það er engum öðrum til að dreifa í þessum máli en ákærðu þremur,“ sagði Karl Ingi. Allir fegra sinn hlut, segir saksóknari Hann gerði framburð Matthíasar að umtalsefni, en í vitnisburði hans á mánudaginn bar hann hafi ekki tekið þátt í árásinni á Hjörleif og ekki verið fullkomnlega meðvitaður um hvað var að gerast þetta kvöld. Lögmaður hans hafði farið fram á frávísun ákærunnar. Aftur á móti báru bæði Lúkas Geir og Stefán á fyrsta degi aðalmeðferðar að Matthías hafi beitt Hjörleif ofbeldi, meðal annars með bíltjakk, þeir hefðu beitt takmörkuðu ofbeldi en Stefán sagðist þó hafa brotið hönd hans. „Það er ljóst að ákærðu allir eru að fegra mjög sinn þátt í því ofbeldi sem átti sér stað og reyna að gera sem minnst úr sinni þátttöku í málinu,“ sagði saksóknari. Hann sagði framburð Matthíasar ótrúverðugan og að hann yrði ekki lagður til grundvallar. Hann lýsti því ofbeldi sem Hjörleifur heitinn var beittur og hvaða áverkar hlutust af því. Hann sagði ekki hægt að segja með vissu hvar og hvenær hvaða ofbeldi hefði verið beitt. Það væri mat ákæruvaldsins að það væri ótrúverðugt, nánast útilokað, að ofbeldið hefði eingöngu átt sér stað í bifreið Matthíasar sem hafði verið lagt í iðnaðarbil á Kjalarnesi, þar sem þeir fóru með Hjörleif þetta kvöld. „Það var blóð um alla veggi og á gólfi iðnaðarbilsins. DNA-rannsókn sýnir að það er úr Hjörleifi,“ sagði saksóknari. Ótrúverðugt væri að Matthías hefði getað beitt bíltjakk, eða öðru slíku verkfæri, inni í bílnum eins og Lúkas og Stefán hafa haldið fram. Allir beri jafna ábyrgð Í ljósi þess ósamræmis sem væri í framburði þremenninganna væri ekki unnt að slá því föstu hver hlutur hvers og eins væri, að mati saksóknara. Hann sagði sannað að andlátið mætti rekja til áverka sem allir þrír hefðu veitt. Um væri að ræða samverknað og allir bæru jafna ábyrgð. Karl Ingi fór yfir hvort það hefði verið upprunalegur ásetningur sakborninganna að svipta Hjörleif lífi. „Það er stærsta spurningin í þessu máli,“ sagði hann. Í þessu sambandi reifaði hann að enginn þeirra hefði reynt að koma Hjörleifi heitnum til bjargar eftir að þeir skildu hann eftir ósjálfbjarga, fáklæddan og helsærðan um vetrarnótt. Þeim hefði átt að vera ljóst að hann hefði verið bjargarlaus, hann hefði verið ófær um gang vegna þess að önnur hnéskel hans var brotin. Þeir hefðu átt að geta gert sér grein fyrir að hann myndi látast, yrði hann skilinn þarna eftir án þess að engum yrði gert viðvart. „Ákærðu hefði verið í lófa lagið að hringja t.d. úr síma brotaþola í viðbragðsaðila. Það eina sem vakti fyrir þeim var að hirða peninga af honum og skildu hann svo eftir fyrir opnum dauðanum.“ Tók við fénu af fúsum og frjálsum vilja Farið er fram á þriggja mánaða skilorðsbundið fangelsi yfir 18 ára pilti, sem er ákærður fyrir peningaþvætti í málinu, en þrjár milljónir sem þremenningarnir höfðu af Hjörleifi eftir að hafa tekið lán í hans nafni, voru lagðar á reikning hans. Hann bar við aðalmeðferð á mánudaginn að hann hefði verið hræddur við þremenningana og ekki þorað öðru en að gera eins og þeir sögðu. Saksóknari sagði ljóst að hann hefði tekið við fénu af fúsum og frjálsum vilja, af mönnum sem honum hefði mátt vera ljóst að hefðu fé af fólki með ólögmætum hætti. „En hann hafði val og kaus og gefa upp bankaupplýsingar sínar af fúsum og frjálsum vilja. Hann hefði getað snúið sér til foreldra sinna, til lögreglu. En hann ákvað að láta til leiðast,“ sagði saksóknari. „Hún veit alveg út á hvað leikurinn gengur“ Farið er fram á 24 mánaða fangelsi, þar af þrjá mánuði óskilorðsbundna, yfir tvítugri stúlku sem ákærð er fyrir aðild að frelsissviptingu og ráni, en hún hringdi í Hjörleif heitinn og lokkaði hann út af heimili sínu og í bíl Stefáns, þar sem Lúkas Geir var einnig. Karl Ingi saksóknari sagði að hún hefði átt að vita að til stóð að hafa fé af Hjörleifi með ólögmætum hætti og að hann yrði líklega beittur harðræði af einhverju tagi. „Hún veit alveg út á hvað leikurinn gengur. Hún vissi alveg að Lúkas var ekki að fara að biðja Hjörleif um frjáls framlög.“ Karl Ingi sagði að stúlkan hefði ákveðið að taka þátt í atburðarás sem hún hefði ekki haft sjálf stjórn á, heldur sett stjórnina í hendur Lúkasar og Stefáns. Háttsemi hennar fælist í hlutdeildarbroti. Í dag er síðasti dagur aðalmeðferðar málsins, sem hófst á mánudaginn. Eftir að saksóknari hefur lokið máli sínu, flytja verjendur sakborninganna fimm ræður sínar.