Hildur Sverrisdóttir hefur látið af formennsku þingflokks Sjálfstæðisflokksins og Ólafur Adolfsson hefur tekið við hlutverkinu. Hildur segist hafa hvatt þingflokkinn til að styðja tillögu formanns um nýjan þingflokksformann á fundi í Valhöll í dag. Hún segir það hafa verið upplegg formannsins, Guðrúnar Hafsteinsdóttur, að tilnefna nýjan þingflokksformann en að sjálf hafi hún ákveðið að stíga frá og styðja við hana til að koma í veg fyrir átök í þingflokknum. „Þetta var ákvörðun formanns og svona er nú bara pólitíkin stundum en ég óska Ólafi velfarnaðar í sínu hlutverki og veit að hann mun standa sig með miklum sóma.“