Fremstu fræðimenn heims á sviði þjóðarmorðs hafa lýst því yfir að aðgerðir Ísraels á Gaza uppfylli lagalega skilgreiningu þjóðarmorðs. Minnst 31 hefur verið drepinn í aðgerðum Ísraelshers á Gaza í dag. Herinn heldur áfram áköfum hernaði í Gaza-borg, sem herinn skilgreindi sem vígvöll fyrir helgi. Þar hafa minnst þrettán verið drepin í dag. Alþjóðasamtök þjóðarmorðsfræðimanna (IAGS), sem stofnuð voru 1994 og telur 500 meðlimi, samþykktu sameiginlega ályktun þar sem segir að stefna Ísraels og aðgerðir þess á Gaza uppfylli skilgreiningu þjóðarmorðs samkvæmt sáttmála Sameinuðu þjóðanna um þjóðarmorð frá 1948. Mikill meirihluti félagsmanna, 86 prósent, kaus með ályktuninni. „Þetta er afdráttarlaus yfirlýsing frá sérfræðingum á sviði þjóðarmorðsrannsókna um að það sem er að gerast á Gaza er þjóðarmorð,“ sagði Melanie O'Brien, forseti IAGS, í samtali við fréttastofu Reuters. Minnst 63 þúsund hafa verið drepin í aðgerðum Ísraelshers á Gaza síðan 7. október 2023. Þá hafa á fjórða hundrað dáið úr hungri. Ísraelsk stjórnvöld hafa takmarkað verulega flæði hjálpargagna til Gaza og hafa drepið hundruð manns við dreifingarstöðvar hjálpargagna.