Rauði krossinn og dómsmálaráðuneytið hafa gert með sér samning um áframhaldandi ráðgjafarþjónustu Rauða krossins við flóttafólk vegna fjölskyldusameininga. Þetta kemur fram í tilkynningu frá Rauða krossinum. Samningur vegna þjónustunnar milli félagsmálaráðuneytisins og Rauða krossins féll úr gildi í lok júní en í stjórnarsáttmála nýrrar ríkisstjórnar færðust mál flóttafólks og hælisleitenda í auknum mæli yfir til dómsmálaráðuneytisins. Í tilkynningu Rauða krossins segir að félagið hafi um árabil veitt flóttafólki ráðgjöf vegna fjölskyldusameininga. Í fyrra veitti Rauði krossinn um 250 viðtöl vegna fjölskyldusameininga. Samningur félagsins við dómsmálaráðuneytið um ráðgjöf vegna fjölskyldusameininga gildir til loka árs 2026.