Fylgi Framsóknarflokksins heldur áfram að dragast saman. Flokkurinn mælist með 4,5% fylgi í nýjum þjóðarpúlsi Gallups og hefur ekki mælst minna frá því Gallup hóf að mæla fylgi flokka árið 1992. Þrátt fyrir að vera undir fimm prósenta mörkunum fengi flokkurinn tvo kjördæmakjörna þingmenn, samkvæmt könnuninni. Flokkurinn nýtur áberandi mests stuðnings í Norðvesturkjördæmi, þar sem hann er með ríflega 14% stuðning og Norðausturkjördæmi þar sem 7,8% segjast myndu kjósa flokkinn. Fylgi Viðreisnar minnkar um tæp tvö prósentustig milli mánaða en flokkurinn mælist með 12,9%. Litlar breytingar eru annars á fylgi flokka. Samfylkingin mælist með langmest fylgi, 34,6%, sem er á pari við síðasta mánuð. Flokkurinn fengi 25 þingmenn samkvæmt könnuninni. Sjálfstæðisflokkurinn mælist næststærstur með 19,7% og bætir við sig einu prósentustigi frá síðustu könnun. Þá er Miðflokkurinn með 10,7% og Flokkur fólksins 7,4%. Þjóðarpúls ágúst 2025 Könnunin var gerð dagana 1.–31. ágúst 2025. Heildarúrtak var 10.055 og þátttökuhlutfall 44,5%. Vikmörk á fylgi flokka eru 0,4–1,5 prósentustig. Fleiri kannanir og greiningar má finna á ruv.is/kosningar . Vinstri græn mælast með 3,7% fylgi sem myndi ekki duga flokknum til að ná manni á þing. Alls segjast 3,4%, myndu kjósa Pírata. Vegna þess hvernig fylgið dreifist í þessari könnun myndi það þó duga til að ná einum manni á þing. Það er í Reykjavíkurkjördæmi norður þar sem fylgið mælis 7,7%. Þó er vert að taka fram að nokkur óvissa er með fylgi flokka innan hvers kjördæmis enda færri svör að baki. Sósíalistaflokkurinn mælist með 1,9% fylgi og hefur helmingast frá kosningum.