Fyrir nokkrum árum kom fram kenning um að síðastliðinn áratug eða svo hefði innan við helmingur af umferð á netinu verið mannleg, þ.e. að meirihluti efnis, umferðar og samskipta á netinu hefði verið tilbúningur tölvuforrita til að stýra almenningsáliti og móta skoðanir fólks. Þessi kenning er almennt talin samsæriskenning, en þó að það sé líklega ekki rétt að til sé alþjóðlegt samsæri af þessari stærðargráðu, er þó svo komið að netþjarkar, „bots“ á ensku, eru nú nálægt því að vera meirihluti þeirra sem vafra um netið og í sumum löndum eru þeir í ríflegum meirihluta. Þú getur hlustað á spjallið um þetta mál í Popplandi í spilaranum hér að neðan. Árni Matthíasson fer undir yfirborðið og fjallar um tækni og samfélag í Popplandi. Í síðasta þætti sagði hann frá því að svokallaðir netþjarkar (e. bots) séu að nálgast að vera fleiri en lifandi manneskjur á netinu - netið sé því að verða dautt. Á síðasta ári birti netöryggisfyrirtækið Imperva gögn sem bentu til þess að 51% af umferð um vefinn væri vegna netþjarka og rúmlega þriðjungur þeirrar umferðar væri spilliþjarkar, þjarkar sem iðja í illum tilgangi. Þeir eru til að mynda að „skrapa“ vefsíður, eins og það kallast þegar þjarkur er smíðaður til að afrita öll gögn af vefsetri í óleyfi, þ.e. stela upplýsingum um fólk, notendanöfnum og lykilorðum, og dreifa ruslpósti. Önnur þjarkaumferð er talin eðlilegri, til að mynda þjarkar sem safna upplýsingum fyrir leitarvélar. Stór hluti af aukinni þjarkaumferð er vegna aukins áhuga á gervigreind, því þjarkar eru notaðir til að afla gagna til að þjálfa gervigreindarforrit. Sívaxandi hluti af því efni sem boðið er upp á netinu er líka smíðaður af gervigreind og líka æ stærri hluti samskipta, hvort sem það eru „læk“, athugasemdir eða ámóta. Fyrir vikið verður æ erfiðara að átta sig á hvort sá sem þú ert að spjalla við sé til í alvörunni eða kannski illa innrættur þjarkur. Það gefur líka augaleið að iðulega eru þjarkar að lesa vefsíður sem eru jafnvel búnar til af gervigreindarþjarki, nú eða þjarkar að spjalla við þjarka. Árni Matthíasson fer undir yfirborðið í Popplandi - alla þriðjudaga kl. 13.30. Þá fjallar hann um tækni og samfélag ásamt að spila óþekkta tónlist utan úr heimi.