Eitt líkanna sem Hamas hefur afhent Ísraelum eftir að samið var um vopnahlé er ekki af neinum þeirra gísla sem voru í haldi samtakanna. Þessu greindi ísraelski herinn frá í dag. Þar kom fram að greining á líkunum fjórum sem Hamas afhenti í gær hafi ekki verið af neinum þeirra sem Hamas tók í gíslingu 7. október 2023. Hamas hefur afhent átta lík. Ísraelar krefjast þess að Hamas standi við fyrirheit og afhendi einnig lík 20 gísla sem voru í þeirra haldi. Vopnahléssamkomulagið kveður á um að Ísraelar opni fyrir flutning nauðþurfta um landamærin við Rafah inn á Gaza. Vonir standa til að það verði gert í dag. Ekki er þó einhugur um það og hefur Ben Gvir, ráðherra í ríkisstjórninni, hótað að koma í veg fyrir að nauðþurftir berist til Gaza ef Hamas skilar ekki líkum allra Ísraela. Ísraelska ríkissjónvarpið KAN segir að ríkisstjórnin hafi ákveðið að opna landamærin í Rafah eftir að Hamas tilkynnti að fjögur lík yrðu afhent í dag.