Kvennalið Breiðabliks í fótbolta fór örugglega áfram í 16 liða úrslit Evrópubikarkeppninnar eftir 1-1 jafntefli við Spartak Subotica í Serbíu í dag. Breiðablik vann heimaleikinn 4-0 og var því í býsna góðum málum fyrir seinni leikinn. Soyi Kim skoraði reyndar fyrir heimakonur á 54. mínútu en á þeirri 79. jafnaði Heiða Ragney Viðarsdóttir. Blikarkonur eru komnar í 16 liða úrslit Evrópubikarkeppninnar.RÚV / Hafliði Breiðfjörð Breiðablik vann samtals 5-1 og er því komið, ásamt 15 öðrum liðum, í Evrópubikarinn sem er ný Evrópukeppni í kvennaflokki hjá UEFA, þrepi neðar en Meistaradeildin. Keppt er með útsláttarfyrirkomulagi alla leið, heima og að heiman. Það kemur í ljós á föstudag hver fyrsti mótherji Breiðabliks verður.