Lögreglan á höfuðborgarsvæðinu hefur til rannsóknar mál þar sem erlendir aðilar skrá lén á Íslandi sem svipar til íslenskra fyrirtækjaheita. Lögregla hefur upplýsingar um að minnsta kosti þrjú slík lén. Fyrirtækin vilja ekki láta upplýsa hver þau eru. Fyrirtækjunum hefur verið gert viðvart um málið. Þá hefur lénunum þremur verið lokað af ISNIC sem er skráningarstofa .is veffanga á Íslandi. „Við vitum ekki hvort það séu fleiri,“ segir Steinarr Kr. Ómarsson, lögreglufulltrúi, í viðtali við fréttastofu. Hann segir aðferðafræði svikahrappanna byggja á að taka íslenskt fyrirtækjaheiti og bæta ehf við fyrir aftan. Í tilfelli Ríkisútvarpsins væri falska lénið því www.ruvehf.is. „Það liggur ljóst fyrir að þeir hafa einhverja þekkingu á Íslandi og innviðunum þó svo að við séum ekki búnir að greina að það séu neinir Íslendingar sem tengjast þessu.“ Markmiðið að stunda forstjórasvik Steinarr segir líklegt að tilgangurinn með skráningu fölsku lénanna hafi verið að stunda svokölluð forstjórasvik (e. business email compromise). „Þá reyna þeir annaðhvort að senda svikapósta eða komast inn í pósta hjá þessum fyrirtækjum og plata þannig féhirðana, fjármáladeildirnar eða annað þess háttar til þess að leggja inn á þá peninga, breyta greiðslum eða álíka. Í samskiptum við þessi fyrirtæki sáum við líka að þessir brotaaðilar voru að nota þessar aðferðir til að tengjast birgjunum þeirra,“ segir Steinarr. Fölsku lénin þrjú höfðu ekki verið notuð undir vefsíður en hins vegar hafði verið búinn til póstþjónn fyrir eitt lénið. Skráning á léni er forsenda þess að geta stofnað tölvupóstfang sem kennt er við lénið. Samstarf með innlendum fyrirtækjum og erlendum ríkjum Lögregla komst á snoðir um fölsku lénin fyrir tilstuðlan íslenska netöryggisfyrirtækisins Ambögu. Starfsmenn fyrirtækisins urðu varir við fölsku lénin og tilkynntu þau til lögreglu. „Við erum í ágætis samskiptum við mörg fyrirtæki í þessum netheimi á Íslandi, bæði öryggisfyrirtækin og ýmsa aðila sem reka alls konar þjónustur. Þeir koma og tala við okkur ef þeir sjá eitthvað óeðlilegt hjá sér og við rannsökum það jafnvel með þeim eða með okkar partnerum , til dæmis í Evrópu,“ segir Steinarr. Hann segir lögreglu rannsaka málin í samstarfi við önnur ríki í gegnum Europol. Með því sé oft hægt að nálgast frekari upplýsingar til að fara lengra með málin. Niðurstaða samstarfs með erlendum ríkjum getur einnig verið að aðstoða í erlendum rannsóknum. „Ég er búinn að senda skeyti á Grikkland af því að við sáum að eitt af þessum lénum var skráð í gegnum grískt fyrirtæki. Ég er ekki búinn að fá svar. Þetta er bara ongoing . Við erum ekkert búnir að loka þessu og erum aðeins að sjá hvert þetta fer,“ segir Steinarr.