Ullarframleiðandinn Ístex skuldar enn bændum vegna ullarkaupa. Markaðsaðstæður síðastliðið ár hafa reynst fyrirtækinu erfiðar en jákvæð teikn eru á lofti, segir Sigurður Sævar Gunnarsson, framkvæmdastjóri Ístex. Skuldirnar eru um 170 milljónir og ná til um 1.150 bænda og framleiðenda. Greint var frá því í september að sala hefði dregist saman um 400 milljónir frá sama tímabili í fyrra. Helsta ástæðan fyrir rekstrarhalla síðasta árs er samdráttur í sölu á handprjónabandi erlendis. Sala dróst fyrst saman í Þýskalandi og síðan í Bandaríkjunum. „Það eru nokkrar aðgerðir sem við erum að skoða og fara í. Þetta náttúrulega að mestu leyti snýst um það að finna leið til að auka sölu. Það eru engar greiðslur farnar frá okkur en við leitum allra leiða til lausna og þetta mun verða greitt,“ segir Sigurður í viðtali við fréttastofu. Hann getur ekki svarað því að svo stöddu hvenær af því verður. „Það er vonandi sem allra fyrst.“ Reyna að snúa skipinu við Sigurður Sævar segir síðustu tólf mánuði, það er frá september 2024, hafa verið afar erfiða. Enn sé mikil óvissa á Bandaríkjamarkaði, meðal annars vegna tollamála. Þá hefur dreifingaraðili Ístex í Bandaríkjunum staðið í flutningum á starfsemi sinni frá Rhode Island til Texas með tilheyrandi áhrifum á pantanir og sölu. Um 60% af rekstrartekjum Ístex koma erlendis frá. „Sala á handprjónabandi hefur minnkað verulega. Við höfum verið í aðhaldsaðgerðum og reynt að snúa við skipinu eins hratt og hægt er,“ segir hann. „Þessar tekjur eru nauðsynlegar til að geta staðið við þessar skuldbindingar.“ September og október eru vanalega söluhæstu mánuðir Ístex en undantekning var á því í fyrra. Sigurður segir þá mánuði hins vegar hafa verið mjög góða á þessu ári. „Það er að hjálpa verulega til. Staðan er miklu jákvæðari en hún var fyrir tólf mánuðum akkúrat núna. Núna snýst þetta um að ýta á viðskiptavini og halda áfram að halda þessari söluaukningu frá fyrra ári.“