Samkeppniseftirlitið hefur verið án stjórnar í rúmar fimm vikur. Síðasta stjórn var skipuð til 8. september og enn hefur ekki verið skipuð ný. Hanna Katrín Friðriksson atvinnuvegaráðherra segir að það verði gert á næstu dögum. Hún segir að vel þurfi að vanda skipun stjórnarinnar. „Samsetningin þarf að vera rétt, þannig ef það gerist eitthvað og einhver dettur úr skaftinu þar þá hefur það svona svolítið áhrif á alla vinnuna.“ Meiri háttar ákvarðanir eru bornar undir stjórnina Stjórn Samkeppniseftirlitsins fer með yfirstjórn stofnunarinnar. Hún sækir umboð sitt til ráðherra og ber ábyrgð á stofnuninni gagnvart honum. Hlutverk hennar er að móta áherslur starfsemi og reksturs Samkeppniseftirlitsins. Þá eru meiri háttar efnislegar ákvarðanir bornar undir stjórnina til samþykktar eða synjunar í samræmi við starfsreglur Samkeppniseftirlitsins. Til meiri háttar ákvarðana telst til dæmis íhlutun í mál þar sem um er að ræða ólögmætt samráð, misnotkun á markaðsráðandi stöðu, aðgerðir til að leysa upp samruna og beiting stjórnvaldssekta vegna brota á skyldu til að veita eða afhenda gögn. Hefur þessi dráttur haft áhrif á starfsemi stofnunarinnar? „Nei, hann hefur það reyndar ekki og ég fylgist alveg með því. Það er alveg rétt þetta er stjórn sem tekur þessa stærri úrskurði til umfjöllunar. Þannig að það hefur ekki gerst og mun ekki gerast á meðan þetta tímabil varir vegna þess að við erum að klára þetta,“ segir Hanna Katrín Friðriksson. Ekki hefur verið skipuð stjórn Samkeppniseftirlitsins þrátt fyrir að skipan þeirrar síðustu hefði runnið út fyrir rúmum fimm vikum síðan. Atvinnuvegaráðherra segir að ný stjórn verði skipuð á næstu dögum.