Ish-lojtari i Paris Saint-Germain dhe i kombëtares franceze, Presnel Kimpembe, ka bërë së fundmi deklarata interesante lidhur me fitimin e Ligës së Kampionëve, trofe të cilin e konsideron si kurorëzimin e karrierës së tij. Kimpembe, i cili këtë verë u largua nga kampionët aktualë të Evropës për t’u bashkuar me Qatar SC, foli për presionin unik që ekziston te PSG krahasuar me klubet e tjera të mëdha evropiane. “Do të preferoja të fitoja një Ligë të Kampionëve në Paris sesa pesë me Real Madridin ose me ndonjë klub tjetër, sigurisht me gjithë respektin e duhur. Në Paris është shumë e veçantë. Të gjithë e kanë pritur këtë për shumë vite. Ne luftuam për sukses dhe ishte diçka jashtëzakonisht e komplikuar. E pamë kundër Manchester United, Manchester City apo Bayern Munich në finale,” tha mbrojtësi francez. Kujtojmë se këtë verë, pas shumë viteve investimesh të mëdha dhe përforcimeve të shumta, Paris Saint-Germain më në fund arriti të fitojë Ligën e Kampionëve, duke mposhtur Interin në finale me rezultatin e thellë 5:0. Skuadra pariziene po vazhdon të luajë në nivel të lartë edhe këtë sezon, dhe konsiderohet përsëri si një nga favoritët kryesorë për të mbrojtur trofeun më prestigjioz evropian. /Telegrafi/