Arbër Peci: “Stërvitja nuk të bën të dukesh si burrë, shumë prej meshkujve janë duke u stërvitur që të duken si burra dhe ende nuk po arrijnë.” Gjatë viteve të punës sime në fitness kam pasur fatin të mësoj nga disa prej trajnereve më të njohura në botë si Suzy Kellner, Timea Majorova, Bettina Nagy, Németh Dorottya dhe shumë të tjera. Me to kam ndarë rutina javore, kam parë nga afër si funksionon trupi dhe mendja e femrës gjatë stërvitjes Kam mësuar që çdo detaj ka rëndësi frymëmarrja, qëndrimi, pushimi mes serive dhe sidomos mënyra si e sheh veten në pasqyrë. Prandaj e them me bindje: stërvitja nuk të bën të dukesh si burrë. Shumë prej meshkujve janë duke u stërvitur për t’u dukur si burra dhe ende nuk po arrijnë. Shpesh dëgjoj shprehjen: “Kam frikë të stërvitem se do dukem si burrë.” Por realiteti është tjetër. Trupi i femrës prodhon shumë më pak testosteron sesa ai i mashkullit, ndaj ndërtimi i një trupi voluminoz është biologjikisht i pamundur pa përdorim substancash hormonale. Unë personalisht nuk i referohem dhe nuk i mbështes substancat hormonale. Besoj vetëm në stërvitjen e pastër, në ushqimin e rregullt dhe në disiplinë. Trupi ndryshon natyrshëm kur e trajton si duhet pa shkurtime, pa truke, pa mashtrime. Ajo që ndodh te femrat është e thjeshtë: forcohen, formohen dhe ndihen më mirë me veten. Palestra nuk të heq feminitetin përkundrazi, e përforcon. Të bën më të sigurt, më të qëndrueshme dhe më të vetëdijshme për trupin tënd. Struktura muskulare e burrave dhe grave është e njëjtë. Ndryshon vetëm niveli hormonal dhe përqindja e masës muskulore. Kjo do të thotë që ndarja javore e ushtrimeve mund të jetë e ngjashme për të dy gjinitë, me ndryshime vetëm në intensitet dhe volum. Ja si mund të duket ndarja javore e balancuar e stërvitjes Dita 1 – Gjoksi dhe Tricepsat Bench press, incline dumbbell press, triceps dips, push-ups. Forcim i pjesës së sipërme dhe formësim i shpatullave. Dita 2 – Këmbët dhe Pulpat Squat, leg press, lunges, leg curl, calf raises. Tonifikim i kofshëve dhe forcim i pjesës së poshtme të trupit. Dita 3 – Shpina dhe Bicepsat Lat pulldown, barbell row, pull-ups, biceps curls. Ndërtim i një shpine të fortë dhe përmirësim i qëndrimit trupor. Dita 4 – Pushim aktiv Ecje, stretching ose kardio e lehtë për qarkullim dhe rikuperim. Dita 5 – Muskujt e vitheve dhe qendra trupore (pjesa e mesme) Hip thrusts, cable kickbacks, plank, ab rollouts, leg raises. Formësim i pjesës së pasme dhe forcim i muskujve të barkut e të qendrës trupore. Dita 6 – Krahë dhe qendra trupore Ushtrime të kombinuara për biceps, triceps, parakrahë dhe stabilizim të qendrës trupore. Balancim dhe simetri trupore. Dita 7 – Pushim total Rikuperim. Aty ndodh rritja reale. Në fund të ditës, stërvitja nuk është për t’u dukur, por për t’u ndier. Për mënyrën si ecën, si qëndron dhe si e përballon ditën. Mos ki frikë nga pesha. Nëse shumë burra po mundohen të duken si burra dhe ende nuk po arrijnë, ti mos u ndal. Shko në palestër dhe bëhu versioni yt më i fortë fizikisht dhe mendërisht. /Telegrafi/