Real Madridi po përballet me një problem serioz në mesfushë, ku mungesa e një organizatori të vërtetë po ndikon drejtpërdrejt në lojën e ekipit. Pas disa paraqitjeve të dobëta, përfshirë humbjen ndaj Atletico Madridit dhe dështimin në Anfield kundër Liverpoolit, trajneri Xabi Alonso ka kërkuar nga drejtuesit përforcime urgjente në këtë repart. Sipas tij, skuadra ka shumë talent, me emra si Aurelien Tchouameni, Eduardo Camavinga, Jude Bellingham, Federico Valverde, Dani Ceballos dhe Arda Guler, por asnjëri nuk është ai “truri” që kontrollon ritmin dhe krijon qartësi në ndërtimin e aksioneve. Alonso kërkon një mesfushor kreativ që të luajë pranë Tchouamenit dhe të japë më shumë lidhje mes mbrojtjes e sulmit. Lista e tij e dëshirave përfshin emra si Enzo Fernandez (Chelsea), Alexis Mac Allister (Liverpool), Adam Wharton (Crystal Palace) dhe Vitinha (PSG). Real Madridi kishte tentuar më parë të marrë Martin Zubimendin, por Arsenali fitoi garën. Tani, presioni për të vepruar është i madh, pasi mungesa e kreativitetit po e bën ekipin të parashikueshëm dhe të lehtë për t’u neutralizuar. Klubi është gati të investojë në këtë pozicion, duke e konsideruar thelbësor për ambiciet në Ligën e Kampionëve dhe La Liga. Mesfushori organizator që kërkon Xabi Alonso mund të jetë pjesa që i mungon Real Madridit për të rikthyer dominimin në Spanjë dhe në Evropë. /Telegrafi/