Grindvíkingurinn Alexander Veigar Þorvaldsson er einn fremsti pílukastari landsins en hann leikur einnig körfubolta með úrvalsdeildarliði Grindavíkur. Hann mætti nýlega móður sinni í úrvalsdeildinni og hins vegar heimsmeistaranum Luke Littler. Við hittum Alexander í vikunni og fengum að kynnast honum aðeins nánar. „Ég byrjaði óvænt að kasta, kannski svona 2017. Alex Máni sem vinnur með mér dró mig inn í þetta í grunnskólanum. Síðan var ég óvænt valinn inn í unglingalandsliðið því það voru margir sem sögðu nei,“ segir Alexander Veigar sem er úr Grindavík, líkt og margir af bestu pílukösturum landsins. „Eins og er, erum við allir á topp þrjú úr Grindavík. Það er byrjað að kenna pílu í grunnskólanum sem valfag. Þannig komst ég inn í píluna. Þetta er alltaf að stækka og ég held að það sé píluspjald á nánast hverju heimili.“ Alexander Veigar Þorvaldsson er á meðal bestu pílukastara landsins. Hann mætti nýlega heimsmeistaranum Luke Littler en hann segir hafa tekið meira á taugarnar að keppa við mömmu sína í úrvalsdeildinni. Stefnir á Ally Pally Pílan hefur stækkað ört á Íslandi undanfarin ár og heldur áfram að dafna. Heimsmeistaramótið í pílu er alltaf haldið í Alexandra Palace í London, eða Ally Pally. Þangað flykkjast tugþúsundir áhorfenda ár hvert og markmið Alexanders er að keppa á þessu stóra sviði einn daginn. „Ég stefni á Ally Pally, það væri toppurinn en ég held að byrjunin sé að taka eitthvað erlent mót og komast aðeins lengra í því,“ segir Alexander sem stefnir á atvinnumennsku. „Já, það er planið. Ég er kominn núna með góðan styrktaraðila og við ætlum að reyna að kýla á þetta á næstu mánuðum.“ Auðveldara að mæta heimsmeistaranum en mömmu Á síðasta heimsmeistaramóti sló Englendingurinn Luke Littler í gegn þegar hann fór alla leið og varð heimsmeistari, aðeins 17 ára gamall. Alexander mætti Littler í síðasta mánuði á HM ungmenna. „Ég var nú örugglega minna stressaður á móti honum heldur en flestum öðrum. Það var lítil pressa að keppa á móti heimsmeistaranum sjálfum. Þetta er dálítið svona, óraunverulegt kannski,“ segir Alexander sem spilaði vel gegn heimsmeistaranum en tapaði þó. Stuttu seinna keppti hann svo í úrvalsdeildinni hér heima og lenti þar á móti móður sinni. Erfiðasti leikurinn á ævinni „Ég var eiginlega bara meira stressaður á móti mömmu heldur en á móti Luke Littler. Þetta er eitthvað sem ég hefði ekki geta giskað á fyrir nokkrum árum. Að spila á móti mömmu í beinni útsendingu fyrir framan þjóðina,“ segir Alexander sem átti erfitt með að gíra sig upp í leikinn gegn móður sinni. „Þetta var örugglega erfiðasti leikur sem ég hef spilað á ævinni. -En þú vannst. -Ég vann frekar örugglega já. Því miður, á móti mömmu. Þegar maður mætir í leiki langar mann til að rústa leikjunum en það var erfitt að vilja rústa mömmu sinni í beinni útsendingu fyrir framan alla.“ Spilar líka með körfuboltaliðinu Auk pílunnar spilar Alexander körfubolta með Grindavík sem reynist að sjálfsögðu ákveðið púsluspil. „Það hefur verið frekar auðvelt hingað til. Jóhann, þjálfarinn í körfunni, sýnir góðan stuðning og bara skilning yfir höfuð. En undanfarið hafa utanlandsferðirnar orðið fleiri og það er svona aðeins erfiðara að ná þessu öllu saman með vinnu og öllu. En þetta er búið að ganga hingað til.“ Alexander viðurkennir að metnaðurinn sé meiri fyrir pílu en körfubolta. „Ég stefni ekkert langt í körfunni. Þetta er eiginlega bara félagsskapurinn og reyna að sýna smá lit á æfingum.“ Stefnir á heimsmótaröðina Stærsta mótaröð heims er PDC-mótaröðin. Til þess að komast þangað þarf að fara í gegnum sérstaka undankeppni sem Alexander ætlar að reyna við á næsta ári. Hann er bjartsýnn á að komast inn á mótaröðina. „Ég er búinn að vera að taka góða æfingatörn núna þannig að ég held að það séu góðar líkur á því.“