A escasos metros do lugar do Curro segue en pé e con vida regular o mosteiro de Santa María de Ferreira de Pantón. A pequena comunidade cisterciense que habita as instalacións é das poucas femininas que quedan na Galiza. Pola zona oeste do monumento monástico discorre o río Ferreira e os núcleos de poboación máis próximos son A Lavandeira, Os Castriños, o recinto urbano do Castro de Ferreira e As Bouzas. Localízase o municipio nas depresións que orixinan os ríos Cabe, Miño e Sil, sendo as elevacións montañosas máis prominentes as de San Paio e A Pena Pombeira, con 686 e 703 metros de altitude, respectivamente.