Valgerður Anna Jóhannsdóttir, dósent í blaða- og fréttamennsku við Háskóla Íslands, telur uppsögn útvarpsstjóra og fréttastjóra BBC mjög alvarlega og segir þetta áfall fyrir stofnunina. BBC hefur notið trausts um allan heim og meira heldur en flestir aðrir fjölmiðlar segir hún. „Þetta er gríðarlegt áfall og sést auðvitað á því að bæði útvarpsstjórinn og fréttastjórinn skuli segja af sér.“ „Traust er fjöregg sem er mjög vandmeðfarið, ef þú missir það þá er meira en að segja það að vinna það aftur.“ Valgerður segir að það verði fylgst vel með fréttaflutningi BBC og telur þau eiga brekku fyrir höndum við að endurvinna þetta mál. „Ef ég get ekki treyst BBC, hverjum get ég þá treyst?“ Hún segir þetta vera skilaboð til fjölmiðla og blaðamanna um allan heim að lykilatriðið sé að vanda sig og nota þau vinnubrögð sem vönduð blaðamennska krefst af þeim. Bæði útvarpsstjóri og fréttastjóri BBC sögðu af sér vegna umfjöllunar miðilsins um Donald Trump. Valgerður Anna Jóhannsdóttir, dósent í blaða- og fréttamennsku við Háskóla Íslands, segir þetta vera mjög alvarlegt vegna trausts sem miðillinn hafði.