Íslenska kvennalandsliðið í körfubolta spilar við Serbíu í kvöld í fyrsta leik liðsins í undankeppni EM 2027. Leikurinn er jafnframt fyrsti leikur undir stjórn nýs þjálfara. Pekka Salminen tók við liðinu í mars og hefur því þurft að bíða ansi lengi eftir fyrsta leik sínum. Verkefnið í kvöld er verðugt því Serbía er meðal sterkustu liðanna sem taka þátt í þessari fyrstu umferð undankeppninnar. Ísland er í þriggja liða riðli með Serbíu og Portúgal en tvö efstu liðin fara áfram í seinni umferð undankeppninnar. Þriðja sætið getur þó komist þangað líka ef það er eitt af þeim liðum með bestan árangur í þriðja sæti. Spilað verður í Ólafssal á Ásvöllum í kvöld en leikurinn hefst klukkan 19:30. Hann verður sýndur beint á RÚV 2 og Stofan mun hita þar upp frá klukkan 19:00. Íslenska liðið heldur svo til Portúgal þar sem liðið mætir heimakonum í hinum leik þessa landsleikjaglugga á þriðjudaginn kemur.