Fyrrverandi starfsmaður leikskólans Múlaborgar hefur verið ákærður fyrir nauðgun og kynferðisbrot gegn stúlku á leikskólanum. Maðurinn er á þrítugsaldri og var handtekinn í ágúst á þessu ári grunaður um brot gegn barni. Lögregla hefur síðan rannsakað möguleg brot gegn fleiri en tíu börnum. Í ákærunni segir að maðurinn hafi tvisvar sinnum á árinu átt önnur kynferðismök en samræði við barnið. Hann hafi freklega misnotað yfirburðastöðu sína gagnvart stúlkunni, brugðist trausti hennar og trúnaði sem starfsmaður leikskólans. Í annað skiptið hafi hann notfært sér að stúlkan gæti ekki spornað við verknaðnum sökum svefndrunga. Nánari lýsingar á brotum mannsins gegn barninu hafa verið afmáðar úr ákærunni sem fréttastofu barst frá dómstólnum. Foreldri stúlkunnar krefst fyrir hönd dóttur sinna 7 milljóna króna í skaða- og miskabætur. Dómritari við Héraðsdóm Reykjavíkur vildi ekki gefa upp afstöðu mannsins til sakargiftanna og sagði sér óheimilt að veita þær upplýsingar í ljósi þess að þinghald er lokað. Ákæran var þingfest í héraðsdómi Reykjavíkur í dag, en maðurinn sótti þinghald í gegnum fjarfundarbúnað.